بڕیار درا تا كۆتایی هەڵبژاردنی پەرلەمانی عێراق كە سێ رۆژی ماوە، هیچ گەشتیارێك بۆی نییە لە دەروازەی نێودەوڵەتی باشماخ هاتوچۆی ئێران بكات یان لە ئێرانەوە بكات.
ئارتیكاس ئیقبال قایمقامی مەریوان ئاماژەی داوە، جووڵەی گەشتیاران لەو دەروازەیە لە دوای هەڵبژاردن دەست پێ دەكاتەوە، بۆ ئەو مەبەستەش كۆمەڵیك مەرج دیاری كراوە.
بەگوێرەی فارسنیوز، یەكێك لە مەرجەكان بریتییە لە هەبوونی كارتی ڤاكسین و هەر كەسێك ئەو كارتەی نەبێت، ئەوا بۆی نییە سەردانی ئێران بكات.
پێویستە بگوترێ پێشتر رێ بە بازرگانان و كرێكاران دەدرا بەبێ كارتی ڤاكسینیش لەم سنوورە هاتوچۆ بكەن، بەڵام ئەمجارە ئێران بڕیاری داوە دوای هەڵبژاردن، هەمان مەرج لەسەر ئەوانیش جێبەجێ بكات.
ئەم گۆڕانكارییە نوێیە تەنیا لە دەروازەی باشماخ رووی داوە
ئەم گۆڕانكارییە نوێیە تەنیا لە دەروازەی باشماخ رووی داوە و لە دەروازەی حاجی ئۆمەران هێشتا گەشتیاران دەتوانن گەشت بكەن.
سیروان حوسێن گوتەبێژی كۆمەڵگەی نێودەوڵەتی حاجی ئۆمەران، بۆ "وشە" گوتی، لەو دەروازەیە هیچ بڕیارێكی نوێ نییە و گەشتیارانی هەرێمی كوردستان هێشتا لە چوونیان بۆ ئێران بەردەوامن، بە مەرجێك ڤیزەیان هەبێت .
ئەو روونی كردەوە، هێشتا هیچ رێنوێنییەكیان پێ نەگەیشتووە و ئەگەر هەر رێنوێنی و بڕیارێكی نوێ لەلایەن حكوومەتەوە بەدەستیان بگات، ئەوا جێبەجێی دەكەن.