كتێبی "عێراق مێژوویەك پڕ لە جەنگ و ململانێ" بڵاو دەكرێتەوە كە لە نووسینی ڕزگار حاجی حەمیدە، كتێبەكە 382 لاپەڕەیە و بە تیراژی 500 دانە چاپ كراوە.
رزگار حاجی حەمید نووسەری كتێبەكە، بە "وشە"ی گوت، پشتیوان حەمەسەعید پێشەكی بۆ كتێبەكە نووسیوە، چاپخانەی كارۆ كتێبەكەی چاپ كردووە و بڕیارە لەم رۆژانەدا بگاتە دەستی خوێنەران.
ئەو ئاماژەی دا، "ئەم كتێبە باس لە قۆناغە جیاوازەكانی 100 ساڵی رابردووی عێراق دەكات ، خۆم رووداوەكانم شرۆڤە و شیكار و شەنوكەو كردوون."
باس لە شۆڕشی ساڵانی بیست و هۆكارەكانی بڵاوبوونەوە و هەرەسهێنانی و دامەزراندنی حكوومەتی كاتیی لە عێراقدا دەكات
بەشێكی كتێبەكە باس لە شۆڕشی ساڵانی بیست و هۆكارەكانی بڵاوبوونەوە و هەرەسهێنانی و دامەزراندنی حكوومەتی كاتیی لە عێراقدا دەكات. بەشێكی تر لە كتێبەكە باسە لە كۆتایی جەنگی جیهانی و دۆخی باشووری كوردستان،كێشەی ویلایەتی مووسڵ و پاشان لكانی بە عێراقەوە خراوەتە ڕوو.
لە بەشێكی تری كتێبەكە باس لە كودەتاكانی بەكر سدقی، ڕەشید عەلی گەیلانی و عبدولكەریم قاسم و كودەتاكەی دەیەی شەستەكان كردووە. رۆڵی نووری سەعید لە هاوكێشە سیاسییەكاندا و پاشان بەعسییەكان خراوەتە ڕوو.
جێی باسە ڕزگار حاجی حەمید، نووسەرە و خاوەنی پێنج بەرهەمی تری ئەدەبی و سیاسییە.
سلێمانی/ئاسان محەمەد