سەرۆکاتیا باژێرڤانیا دهۆکێ د داخویانییەکێ دا هەموو داتا و هورکاریێن کار و چالاکی و پرۆژێن سالا 2021ێ بو وشە دیارکرن، ب گورەی داتایێن وان ئەڤ سالە 71 پروژە ب کوژمێ نێزیکێ 11 ملیار دیناران هاتینە دروستکرن.
ئیسماعیل موستەفا، بەرپرسێ راگەهاندنا سەرۆکاتیا باژێرڤانیا دهۆکێ بۆ "وشە" گوت، ئەڤ سالە سەرۆکاتیا باژێرڤایا دهۆکێ 71 پروژێن جودا ل سەنتەرێ باژێرێ دهۆکێ ب کوژمێ نێزیکێ 11 ملیار دیناران ئەنجامداینە کو پێکهاتبوون ژ پرۆژێن جوراوجور.
زێدەتر گوت، ژ گرنگترین ئێک ژ وان پروژان، پرۆژێ چێکرنا ئوڤەرپاسا نێزیک قوتابخانا سەفین بوو ب کوژمێ شەش ملیار دیناران کو راستەوخۆ ژلایێ وەزارەتا باژێرڤانی و گەشتوگۆزار هاتبویە ئەنجامدان، ب کوژمێ پتری سێ ملیار دینار ژی چەندین جاددەیێن نافخوە ل ناڤا سەنتەرێ باژێرێ دهۆکێ لسەر بودجا گشەشەپێدانا پارێزگەها دهۆکێ هاتینە دروستکرن، دیسان ب کوژمێ ئێک ملیار دینار 26 پروژە لسە داهاتێ باپێرڤانیێ هاتینە دروستکرن و 42 پروژە ژی لسەر پێشینەیێن هەیڤانە ب کوژمێ نێزیکێ 800 ملیون دینارن هاتینە چێکرن و زێدەتر پرۆژێن بچوک بوون.
نێزیکێ 174 هزار تەنێن بەرمایکا ل دهۆکێ هاتینە کومکر
ناڤبری د درێژاهیا ئاخفتنێن خودا دیارکر ژی کو ب کوژمێ نێزیکێ 34 ملیار دیناران دێ پروژەکێ نوو ههێتە چێکرن کو؟ئەو ژی پروژێ چێکرنا ئوڤەرپاس و ئەندەرپاسا ترافیکا بناڤی یە و گوت، رەزامەندی ل سەر 22 پروژان هاتیەکرن و دێ ل سالا نوو هێنە چێکرن، دیسان نێزیکێ 174 هزار تەنێن بەرمایکا ل دهۆکێ هاتینە کومکرن، دیسان 517 کەپر و بیستان و پەرجان هاتینە خراپکرن کو ب زێدەگاڤی ل سەر مولکێن گشتی هاتبونە چێکرن، هەر دیسان هزار و 700 جهێن جودا ژ بەر سەرپێچیان هاتینە گرتن.
ئیسماعیل موستەفایی ئاماژە ب وێ یەکێ کر ژی کو 533 مولەتێن ئاکنجیبوونێ و و 346 مولەتێن بازرگانی و 16 مولەتێن خزمەتگۆزاری و 426 مولەتێن جودا ب وەلاتی و جهێن گشتی و جودا داینە و زێدەتر گوت، ئەڤ سالە هزار و312 کەس ل گورستانا شاخکێ کو مەزنترین گورستانە ل دهۆکێ هاتینە ڤەشارتن، کو ئەو ژی716 ژ رەگەزێ مێ و 596 ژی ژ رەگەزێ نێر بوون، پشکەکا هەر زور ژی ئەو بوون کو ب کۆرۆنایێ گیانێ خوە ژ دەستدایی.