بەهۆی خۆڵبارینەوە وەزارەتی پەروەردەی عێراق، ئەمڕۆی كردە پشووی فەرمی لە ناوەندەكانی خوێندن و ئەنجامدانی تاقیكردنەوەكانیشی دواخست.
ئەمڕۆ دووشەم 16ـی ئایار، بەهۆی ئەو شەپۆلە خۆڵبارینە چڕەی شارەكانی عێراق و هەرێمی كوردستانی گرتووەتەوە، دەوامی سەرجەم قۆناغەكانی خوێندن لە عێراقدا ڕاگیران و تاقیكردنەوەكانیش دوا خران.
لە ڕاگەیەنراوێكی وەزارەتی پەروەردەی عێراقدا هاتووە، بەهۆی ئەو شەپۆلە خۆڵبارینەی ئەمڕۆ لە سەرجەم ناوەندەكانی خوێندن پشوو دەبێت و تاقیكردنەوەكانیش بۆ سبەی دوا دەخرێن.
چڕیی خۆڵبارینەكە وایكردووە لە بەشێكی شارۆكەكانی سەر بە پارێزگاكانی بەغدا، كەركووك، واست، دیوانیە، دیالە و بابل دەوامی فەرمانبەران كرایە پشووی فەرمی.
لە درەنگانی شەوی رابردوو شەپۆلێكی خۆڵبارین شارەكانی عێراقی گرتووەتەوە، بەشێك لە تەندروستیی چەند شارێك پێشتر ئامادەكارییان كردبوو بۆ ئەو خۆڵبارینە لە نەخۆشخانەكان.