سەرۆكی هەرێمی كوردستان پێشوازیی لە هەڵسووڕێنەری باڵوێزخانەی ئازەربایجان لە عێراق كرد، لەبارەی برەودان بە پێوەندییەكانی عێراق و هەرێمی كوردستان لەگەڵ ئازەربایجان، بیروڕایان گۆڕییەوە.
ئەمڕۆ چوارشەم حەوتی حوزەیران، نێچیرڤان بارزانی سەرۆكی هەرێمی كوردستان، لە دیدارێكدا لەگەڵ نەسیر مەمەدۆف هەڵسووڕێنەری باڵوێزخانەی ئازەربایجان لە عێراق، لەبارەی برەودان بە پێوەندییەكانی عێراق و هەرێمی كوردستان لەگەڵ ئازەربایجان، بیروڕای گۆڕییەوە.
هەردوولا هاوڕا بوون كە زەوینە و دەرفەتی باش هەن بۆ برەودان بە پێوەندییەكان بەتایبەتی لە بواری ئابووری، بازرگانی و گەشتیاریدا. لەمبارەیەوە باس لە دەستپێكردنی پرۆسەی كردنەوەی كونسوڵگەی ئازەربایجان لە هەرێمی كوردستان و ڕێكاری پێویست كرا، كە پێشتر لە كۆبوونەوەی سەرۆكی هەرێمی كوردستان و سەرۆكی ئازەربایجان لە میونشن بڕیاری لێ درابوو.
سەردانە چاوەڕوانكراوەكەی سەرۆكی هەرێمی كوردستان بۆ باكۆ لەسەر بانگهێشتی فەرمیی سەرۆكی ئازەربایجان، دۆخی ناوچەكە بەگشتی و چەند پرسێكی جێی بایەخی هاوبەش، تەوەرێكی تری دیدارەكە بوون.