ژورا بازرگانی و پێشەسازیا دهۆکێ وەکو بزاڤەک بو بوردمانێن ئیرانێ بو هەرێما کوردستانێ و هەولێرێ ددەت دیارکرن کو ئەو بزاڤێ دکەن بەرهەمێ خومالی وەکو پێگوهرک ببینن ل شونا بەرهەمێ بیانی بتایبەت ئیرانی.
شوکری جەمیل، سەڕۆکێ ژورا بازرگانی و پێشەسازی یا دهۆکێ دیارکر کو پشتى هێرشا بێ به‌هانه و سته‌مكارانه یا كۆمارا ئیسلامى یا ئیرانێ ل سه‌ر هه‌ولێرا پایته‌ختێ كوردستانێ ل 15ى ڤێ هه‌یڤێ، كو تێدا وه‌لاتیێن سڤیل بوونه ئارمانج و ب مخابنى ڤه ئێك ژ سه‌رمایه‌دارێن ب ناڤوده‌نگ یێن كوردستانێ بناڤێ پێشره‌و مه‌جید دزه‌یی ل گه‌ل كچه‌كا خۆ شه‌هیدبوون و سێ ئه‌ندامێن مالباتا وى ژى ب گرانى برینداربوون، هه‌روه‌سا ئێك ژ بازرگانێن دیار یێن ئیراقێ ژى د وێ هێرشێ دا شه‌هیدبوو كو هه‌ر هه‌مى خه‌لكێ بێ گونه‌هـ و سڤیل بووینه و گوت، دیاره كو ئارمانجا هێرشێ ب تنێ تێكدانا ئاساییش و سه‌قامگیریا كوردستانێ و رێگرتنه ل پێشڤه‌چوونێن وێ یێن ئابوورى و بازرگانى و پیشه‌سازى، لەوا ئه‌م ل ژۆرا بازرگانى و پیشه‌یازیا دهۆكێ دوباره ڤان هێرشێن سته‌مكارانه ل دژى خه‌لكێ سڤیلێ كوردستانێ ب دژوارى ئیدانه و شه‌رمزار دكه‌ین و هه‌ڤخه‌میا خۆ دگه‌هینینه مالباتێن قوربانیان و ژۆرا بازرگانى و پیشه‌سازیا هه‌ولێرێ كو ئێك ژ ئه‌ندامێن وێ یێن كارا تێدا شه‌هیدبوو.
زێدەتر گوت، نوکە دا هژماره‌كا مه‌زن یا به‌رهه‌مێن ئیرانى د بازارێن مه دا هه‌نه، ئه‌م ل ژۆرا بازرگانى و پیشه‌سازیا دهۆكێ ب هویرى ڤه‌كولینێ ل سه‌ر دیتنا بازارێن پێگهۆر بۆ بازرگانێن خوە دكه‌ین بۆ وێ یه‌كێ ل جهێ به‌رهه‌مێن ئیرانى، ب به‌رهه‌مێن خۆمالى و یێن وه‌لاتێن دى یێن ده‌ڤه‌رێ و جیهانێ پێدڤیا خه‌لكێ پارێزگه‌ها دهۆكێ و كوردستانێ پڕ بكه‌ن، ژ پلان و كارێن مه یێن ده‌ستپێكى یه كو به‌رهه‌مێن ناڤخۆیی ل دویڤ ستانداردان بینینه ئاستێ به‌رهه‌مێن وه‌لاتێن جیهانێ بۆ وێ یه‌كێ د سالێن نێزیك دا ئه‌م بشێین پشتبه‌ستنێ ل سه‌ر به‌رهه‌م و شیانێن ناڤخۆیی بكه‌ین و بكه‌ینه پێگهۆر بۆ به‌رهه‌مێن بیانى.
ل سنورێ پارێزگەها دهۆکێ پتری دوو هزار بازرگان و پێشەساز هەنە و بزاڤێن خورت بو پێشڤەبرنا بەرهەمێ خومالی دکەن ب تایبەتی پێشەسازیا خوراکی.