لە كۆنگرەیەكی رۆژنامەوانیی نێوان سەرۆكی حكوومەتی عێراقی فیدراڵ و سەرۆكی هەرێمی كوردستاندا، سەرۆك وەزیرانی عێراق دووپاتی لە رژدیی حكوومەتی عێراق كردەوە بۆ ناردنی مووچەی مووچەخۆرانی كوردستان. لە بەرانبەریشدا سەرۆكی هەرێم رای گەیاند، خۆشحاڵین بە رێككەوتنی نێوان مەسروور بارزانی و سوودانی لەبارەی مووچەوە.
محەمەد شیاع سوودانی سەرۆك وەزیرانی عێراق، لە كۆنگرەیەكی رۆژنامەوانیدا لەگەڵ نێچیرڤان بارزانی سەرۆکی هەرێمی کوردستان، لە بەغدا رای گەیاند، ئێمە رژدین لەسەر ناردنی مووچە بۆ مووچەخۆرانی هەرێمی كوردستان، ئەمەیش لەمیانی هاوئاهەنگی نێوان هەردوو حكوومەتی هەرێمی كوردستان و حكوومەتی فیدراڵدا.
کەمێک پێش ئێستە، شەشی نیسانی 2024، لە كۆنگرە رۆژنامەوانییە هاوبەشەكەدا، نێچیرڤان بارزانی سەرۆكی هەرێمی كوردستان، رای گەیاند، "خۆشحاڵین لە ئەنجامی ئەو رێككەوتنانەی لە نێوان مەسروور بارزانی سەرۆك وەزیرانی كوردستان و محەمەد شیاع سوودانی سەرۆك وەزیرانی عێراق كراون، ئەوان گەیشتوونەتە ئەو ئەنجامەی كە پێویستە لە چوارچێوەی ئەو رێككەوتنەدا مووچەی مووچەخۆرانی كوردستان مانگانە بنێردرێت و هیوادارین ئەم رێككەوتنە بەردەوامیی هەبێت".
رۆژی چوارشەم 3/4/2024، مەسروور بارزانی سەرۆكی حكوومەتی هەرێمی كوردستان، لە ڕاگەیەنراوێكی فەرمیدا "چارەسەربوونی كێشەی مووچە"ی ڕاگەیاند و دڵنیایی بە خەڵكی كوردستان دا كە لەگەڵ گەیشتنی بودجەی مانگی سێ، دەست بە دابەشكردنی مووچە دەكرێت لە پێش جەژندا.
لای حۆیەوە شاندی حكوومەتی هەرێم بە سەرۆكایەتیی وەزیری دارایی، هەمان رۆژ لە بەغداوە گەڕانەوە هەولێر و دوا رێككەوتنیان لەگەڵ وەزارەتی دارایی عێراق ڕاگەیاند، دوای ئەوەی بارزانی و سوودانی هەموو بەربەستەكانی بەردەم كێشەی مووچەیان چارەسەر كرد.
كێشەی مووچەی كوردستان و بە كارتكردنی بۆ گوشار لەلایەن بەغداوە، لە شوباتی 2014 دەستی پێ كرد، كاتێك نووری مالیكی بودجەی هەرێمەكەی بڕی، دواتر بەشێوەی جیاواز چارەسەری كاتیی كراوە و دواتر لە دۆخێكی تردا بەغدا وەك كارتی برسیكردن بەكاری هێناوەتەوە بۆ لاوازكردنی كوردستان، بەڵام هیچ كات حكوومەتی هەرێم ئامادە نەبوو دەست لە مافە دەستوورییەكانی خۆی هەڵبگرێت و مل بۆ ئەو گوشارانە بدات.
لە دوا ڕێككەوتنیشدا سەرۆكی حكوومەت ئەوەی مسۆگەر كرد كە لیستی مووچەی پێشمەرگە و دەزگا تەناهییەكانی كوردستان، بە "كۆد" بنێرن نەك ناوی سیانی. لە كاتێكدا عێراق بۆ ماوەی 15 رۆژ دەستی بەسەر مووچەی دەزگا تەناهییەكان و پێشمەرگەدا گرت، بۆ ئەوەی كێشە بخاتە نێوان فەرمانبەری مەدەنی و سەربازی، بەڵام چارەسەرەكە بە دڵی كوردستان و سەروەرییەكانی تەواو بوو.