ب مەرەما دوبارەنەبونا روودانێن لەهیان ل دهۆکێ، 30 خانی کو دکەڤنە سەر رووبارێ هشکەڕۆ هاتنە خراپکرن و شنا وێ دێ بیتە جهێ دەربازبونا ئاڤا باران و لەهیان ل وەرزێ زڤستانێ، ئەڤ پرۆسە دێ یا بەردەوام بیت هەتاکو هەموو خانی یێن دبنە رێگر بهێنە خراپکرن.
ئیسماعیل موستەفا، بەرپرسێ راگەهاندنێ ل سەڕۆکاتیا باژێرڤانیا دهۆکێ بۆ "وشە" گوت، سەروكاتیا باژێرڤانیا دهوكێ و رێڤەبەریا باژێرڤانیا روژهەلات، دەمێ 10 روژایە دەست ب خرابكرنا وان خانێن دەورۆبەرێ رووبارێ هشكەڕۆی کریە، ئەو خانیێن کۆ هاتینە قەرەبوكرن ب شوقەیێن ئاكنجیبونێ، ژ 150 خانیان، 30 ژ وان خانیان هاتینە خرابكرن و كار یێ بەردەوامە هەتاکو هەموو دوماهی دهێن.
زێدەتر گوت، مەرەم ژ خراپکرنا وان ئەوە کو رووداێنن لەهیان ل دەمێ بارینا بارانێن بهێز دروست نەبن و رێیا ئاڤێ ڤەبیت، ژبەرکو ئەڤ خانیە ببونە ئەگەر کو باران کوم بیت و لەهی دروست بن و کارەسات دروست بن.
ئەڤ سالە ژ ئەگەرێ دروستبونا لەهیان ل رووبارێ هشکەڕۆ پتری 1250 خانی توشی زیانێن زور بون، لەوا ب بریارا سەروک بارزانی هەموو خانی هاتنە قەرەبوکرن، ژ وان ژی 150 خانی ب دانا شقەیان هاتنە قەرەبوکرن.
حوکمەتا هەرێما کوردستانێ ژی وەکو بەرنامەییەکێ دارشتی، دەست ب چێکرن و بەرفرەهکرنا رووبارێ هشکەڕۆی کریە بۆ هندێ ئەڤ روودانە دووبارە نەبن.
ب گورەی بریارا حوکمەتێ، ژبلی وان 150 خانیان، هەڤدەم گەلەک ژ خانیێن دی دێ هێنە راکرن، هندەک ژ وان لەهیان نە خراپکرینە و خانیێن تاپونە ژی، بەلێ ژبەرکو ل هەمبەر دەربازبونا ئاڤا لەهیان رێگرن، دێ ئەو ژی هێنە راکرن و قەرەبوکرن.