یانەی ریال مەدریدی ئیسپانی هەوڵەكانی دەست پێ كردووە بە مەبەستی گرێبەستكردن لەگەڵ كریستۆف بیاتیكی هێرشبەری پۆڵەندی لە یانەی جەنەوای ئیتاڵی لە ماوەی گواستنەوەی زستانەی ئێستای یاریزاناندا.
ماڵپەڕی (كارلچیۆ میركاتۆ)ی ئیتاڵی بڵاوی كردەوە: یانەی شاهانە بەفەرمی دەستی بە گفتوگۆكان كردووە بۆ گرێبەستكردن لەگەڵ بیاتیك و بۆ ئەمەش بڕی 30 ملیۆن یۆرۆی ئامادە كردووە.
لەبەرامبەریشدا بەرپرسانی یانەی جەنەوا رایانگەیاندووە كە بە كەمتر لە 60 ملیۆن یۆرۆ دەستبەرداری ئەم هێرشبەرە پۆڵەندییە نابن.
جێی باسە بیاتیك لەم وەرزەی خولی ئیتاڵیا بەشێوەیەكی بەرچاو دەركەوتووە و تا ئێستاش توانیویەتی 13 گۆڵ تۆمار بكات و دوای كریستیانۆ رۆناڵدۆی پورتوگالی لە یانەی یۆڤێنتۆس لە ریزبەندی دووەمی گۆڵكارانی خولەكە دێت.