لە مانگێکدا 100 هەزار گەشتیار لە باشماخەوە هاتوچۆیان کردووە

:: PM:04:00:09/07/2019 ‌

تەنیا لەماوەی مانگی رابردوودا و لە خاڵی سنووری نێودەوڵەتی باشماخەوە 54 هەزار گەشتیاری هەرێمی كوردستان، بەهۆی نەمانی پارەی بیمە و فیزای ئێرانی، سەردانی كۆماری ئیسلامی ئێرانیان كردووە و زیاتر لە 50 هەزار گەشتیاری ئێرانیش هاتوونەتە خاكی هەرێمەوە.

ئەمڕۆ سێشەم نۆی تەمووز، مەریوان كەریم، بەرپرسی بەشی راگەیاندن و پێوەندییەكانی خاڵی سنووری نێودەوڵەتی باشماخ، بە "وشە"ی راگەیاند، لەدوای رێكکەوتنی نێوان هەردوو حكوومەتی ناوەند و ئێران و لابردنی پارەی بیمە و فیزا لەلایەن ئێرانەوە، مانگی حوزەیرانی رابردوو 54 هەزار هاووڵاتی و گەشتیار لەهەرێمی كوردستانەوە و لەرێگەی باشماخەوە، سەردانی وڵاتی ئێرانیان كردووە.

روونیشیكردەوە،"هاوكات هەر لەو ماوەیەدا، 52 هەزار گەشتیاری ئێرانی "فارس و كوردانی رۆژهەڵات" بە هەمان شێوە لەڕێی باشماخەوە سەردانی شار و ناوچە جیاوازەكانی هەرێمی كوردستانیان كردووە".

مەریوان کەریم دووپاتی دەکاتەوە، پێویستە ئەو كەسانەی لە سنوورەكان دێن و دەچن و بەهەر هۆیەك بێت دەیانەوێت گەشت بكەن لە نێوان هەرێم و ئێران، بێ پاسپۆڕت و فیزای ئەلیكترۆنی رێگەیان پێنادرێت هاتوچۆ بكەن و دەبێت ئەم خاڵە لەبەرچاو بگیرێت كە فیزا ماوە تەنیا بڕە پارەكەی بۆ هاووڵاتیانی هەرێم لابراوە و بۆ ئێرانییەكانیش كاتێك دێنە هەرێم بڕە پارەیەكی كەمیان لێ وەردەگیرێت.

باشماخ، یەكێكە لە دەروازە سنوورییەكانی هەرێمی كوردستان و نزیكەی شەش كیلۆمەتر لە شارۆكەی پێنجوێنی سەر بە پارێزگای سلێمانی دوورە و هاوسنوورە لەگەڵ شاری مەریوانی رۆژهەڵاتی كوردستان و رۆژانە كاروباری بازرگانی و گەشتیاری لێوە ئەنجامدەدرێت.

هەولێر/ رێبین پێنجوێنی



وشە - هیدایه‌ت جان

ئه‌م بابه‌ته 96 جار خوێنراوه‌ته‌وه‌‌