بە بڕیارێكی جێگری یەكەمی سكرتێری گشتی یەكێتی نیشتمانی كوردستان سەرجەم پلە تایبەتەكانی یەكێتی كە لە بەغدا وەریان دەگرێت دەگۆڕدرێن، ئەندامێكی سەركردایەتی یەكێتی دەڵێت، ئەو پۆستانە ساڵانێكە لە لایەن كەسانێك بەڕێوەدەبرێن و دەبێت بگۆڕدرێن.
ئەمڕۆ پێنجشەم 22ی ئاب، مستەفا چاوڕەش ئەندامی سەركردایەتی یەكێتی نیشتمانی كوردستان بە "وشە"ی ڕاگەیاند، بڕیاری گۆڕینی سەرجەم پۆستی پلە تایبەتەكان لە هەرێمی كوردستان و لە عێراق دراوە و تەنیا ئەوانەی هەولێر زیاتر لە 150 پۆست دەبن و بەپێی بڕیارەكە سەرجەمیان دەگۆڕدرێن.
ڕوونیشی كردەوە كە پۆستەكانی حكوومەتی عێراق ئەوانەی پشكی یەكێتین و ساڵانێكە لەو پۆستانە ماونەتەوە و نەگۆڕدراون، ئەوانیش سەرجەمیان دەگۆڕدرێت.
لای خۆیەوە محەمەد وەتمان ئەندامێكی تری سەركردایەتی یەكێتی بە "وشە"ی ڕاگەیاند، ئەو پۆستانەی یەكێتی كە لە بەغدا وەریگرتوون لە بەڕێوەبەر و بریكار و ژمارەیان زۆر نییە و كەمتر لە 40 پۆست دەبن.
ئاماژەی بەوەیش كرد، پۆست هەیە زیاتر لە حەوت ساڵە كە پشكی یەكێتییە كەسێك بەڕێوەی دەبات، ئێستە كاتی ئەوە هاتووە سەرجەمی ئەو پۆستانە بگۆڕدرێن و كەسی باش بخرێنە شوێنەكانیان.
پۆستەكانی یەكێتی لە پلە تایبەتەكان لە هەرێمی كوردستان زیاتر لە هەزار پۆست دەبن بە تایبەت لە سنووری پارێزگای سلێمانی.
سلێمانی/ هۆشیار عەلی