لە پێنجوێن وەرزی چنینەوەی تەماتەیە

لەسنووری پێنجوێن، بەتایبەت ناوچەی چەمی شلێر، تەماتەیەكی زۆری لێ بەرهەم دێت کە بە تەماتەی پێنجوێن ناسراوە و یەكێكە لە تەماتە بەناوبانگەكانی كوردستان و ئێستا وەرزی چنینەوەی دەستیپێكردووە.

محەمەد نوری، یەكێك لە جووتیارانی پێنجوێن بە "وشە"ی راگەیاند، لە مانگی پێنجەوە چاندنی شەتڵی تەماتە دەستی پێ كردووە و تا نزیكەی هاتنی وەرزی پایز پێگەیشتن و چنینەوەی بەردەوامی دەبێت و جووتیارانیش لە هەوڵی ساغكردنەوەی بەرهەمەكان دەبن.

زیاتر روونی دەکاتەوە، لەبەرئەوەی ئەمساڵ تەماتەی ناوخۆیی زۆرە، بۆیە وەك پێویست ناتوانین بیبەینە بازاڕەکان و پارەمان بۆ ناكات.

"بە هەوڵ و هیلاكبوونێكی زۆر تەماتە پێدەگات و ئەگەر تا كۆتا شەوی پایز نەیچنینەوە، ئەوا بەهۆی سەرماوە تەماتەكەمان لەناو دەچن و شەختە لێیان دەدات، دەبێت ئەگەر پارەش نەكات بە ناچارییەوە تەماتەكەمان بنێرینە بازاڕەوە" محەمەد نووری وای گوت.

ئەو جووتیارە پێنجوێنییە دووپاتی دەکاتەوە، بڕیارەكەی وەزارەتی كشتوكاڵ و سەرچاوەكانی ئاوی حكوومەتی هەرێمی كوردستان، كاریگەری لەسەر بەرزبوونەوەی نرخی تەماتە نەبووە و تەماتە ئێستا نرخەكەی زۆر نزمە و پارە ناكات.

شارۆكەی پێنجوێن، نزیكەی 96 كیلۆمەتر لەشاری سلێمانییەوە دوورە و ساڵانە بڕێكی زۆر تەماتەی لێ بەرهەم دەهێنرێت و لەسەر ئاستی كوردستانیش بەرهەمهێنەری یەكێك لە باشترین جۆرەكانی تەماتەی كوردییە.

پێنجوێن/ رێبین پێنجوێنی