ئینتفاز قەنبەر سەركردەی پارتی موستەقبەلی عێراقی تیشك دەخاتە سەر چەند پرسێكی ئێستەی عێراق و بۆ "وشە" دووپاتی دەكاتەوە كە قسەیەك هەیە لە واشنتن كە "لەگەڵ عێراق دەمێنینەوە، بەڵام بەغدامان ناوێت"، بۆیە ئێستە بیركردنەوەیەكی نوێی ئەمەریكی هەیە بۆ مامەڵەكردن لەگەڵ عێراق، لەگەڵ گەل و لایەنە سیاسییەكان كە پێوەندی باشیان لەگەڵ ئەمەریكا هەیە، هاوكات فەرامۆشكردنی حكوومەتی عێراقی.
*سەردانەكەی موقتەدا سەدر بۆ ئێران چۆن دەخوێننەوە و راستە پەیامێكە بۆ ئەمەریكا و ئیسرائیل؟
موقتەدا سەدر سەركردەیەكی گرنگی سیاسی و ئاینی شیعەیە پێویستە پێوەندی لەگەڵ ئێران وەك وڵاتێكی دراوسێی عێراق هەبێت. سەرانی شیعەی عێراق ناتوانن لە بازنەی ئێران بچنە دەرەوە و ئەگەریش دووربكەونەوە هەر لەناو بازنەكە دەمێننەوە و ئەگەریش زۆر دووربكەونەوە رەنگە دووچاری چارەنووسی ترسناك ببنەوە، گەلانی ئێران و عێراق چەندان پێوەندیان بەیەكەوە هەیە، دەزانین كە سەدر ناتوانێت لە چوارچێوەی پێوەندییەكانی ئێران بچێتە دەرەوە تا ئەوكاتەی ئێران دەسەڵاتی گەورەی لەناو عێراقدا هەبێت.
سەرانی شیعەی عێراق ناتوانن لە بازنەی ئێران بچنە دەرەوە و ئەگەریش زۆر دووربكەونەوە، رەنگە دووچاری چارەنووسی ترسناك ببنەوە كە هەڕەشەیان دەخاتە سەر، بۆچوونێك هەیە بەوەی سەید محەمەد سەدڕ باوكی موقتەدا سەدر بەدەستی هەواڵگری عێراق نەكوژراوە وەك باس دەكرێت، بەڵكو بەدەستی بەكرێگیراوانی ئێران كوژراوە، چونكە داوای حەوزەی عەرەبی دەكرد. رەنگە هەر ئەوە بێت لە خەیاڵی سەدر هەبێت، ئێمە وا دەخوازین سەدر پەیامێكی گەلی عێراقی بۆ بەرپرسانی ئێران پێ بێت بەوەی خۆسەپاندن بەسەر عێراق و دەستوەردان لە كاروباری و هەڕەشەكردن لە سەروەرییەكەی بەس بێت، چونكە ئەگەر حكوومەتی ئێران لاواز نەبێت، هیچ سەركردەیەكی عێراق نابینین بتوانێت بەرووی ئێران بوەستێتەوە. ئێمە كێشەمان لەگەڵ رژێمی ئێران هەیە كە عێراق بەكار دێنن و ئەزیەتی دەدەن و سوودی لێ وەردەگرن، لەوە تێدەگەین كە دەبێت سەدر مامەڵەیان لەگەڵدا بكات، چونكە تێدەگەین بەوەی ئەوان بەتەواوەتی كۆنترۆڵی عێراقیان كردووە.
*لێرە و لەوێ قسە لەسەر هەوڵ بۆ لادانی عادل عەبدولمەهدی و وەرگرتنەوەی متمانە لێی دەكرێت، تا چەند ئەو هەوڵانە سەردەگرن و ئێران رۆڵی تیایاندا هەیە؟
وەك خۆم بەپەرۆش نیم بۆ بابەتی لادانی عادل عەبدولمەهدی، چونكە لە سایەی رژێمی سیاسی ئێستە ئەگەر لابچێت، یەكێكیتری وەك ئەو یان خراپتر و بەدبەختتر لەو دێت، چونكە سیستەمی سیاسی لە عێراق بەتەواوەتی شكستخواردووە و تا ئێستە ئێران كۆنترۆڵی بەسەر سیاسەتوانانی عێراق هەیە و خواستی نیشتیمانی بوونی نییە و خۆچەماندنەوە بۆ ئێران هەیە، تا ئەوكاتەی پرۆسەی سیاسی لە بەغدا ئازاد دەبێت لە باڵادەستیی ئێران، هیچ جیاوازی و گۆڕانێك نابینین، بۆیە پێم وایە عادل عەبدولمەهدی و حكوومەتەكەی رووخاون ئەگەر لە دەسەڵاتیش مابن، چونكە ئەوان لەلایەن نێودەوڵەتییەوە بێزراون و ئەمەریكا خەریكە بەرەو دوورخستنەوەی حكوومەتی عێراق دەچێت وەك هاوپەیمانێك و ئێستە قسەیەك هەیە لە واشنتن كە دەڵێت، ئێمە لەگەڵ عێراق دەمێنینەوە، بەڵام بەغدامان ناوێت.
ئێستە بیركردنەوەیەكی نوێی ئەمەریكی هەیە بۆ مامەڵەكردن لەگەڵ عێراق وەك گەل و لایەنە سیاسییەكان كە پێوەندی باشیان لەگەڵ ئەمەریكا هەیە هاوكات فەرامۆشكردنی حكوومەتەكەی، حكوومەتی عێراق لەرێگەی هەڵوێستە لاوازەكانی و لێدوانی وەزیری دەرەوەی بە پاڵپشتیكردنی بۆ ئێران و رێگەدان بە فڕۆكە بێ فڕۆكەوانەكان بە لێدانی ئامانجەكانی سعوودیە بەبەكارهێنانی خاكی عێراق خۆی و متمانەی خۆی لەناوبرد، هەموو ئەو بابەتانە متمانەیان نەهێشت، بۆیە حكوومەتی عێراق شێوەییە نە گەلی عێراق باوەڕی پێ دەكات و نە دنیاش و بەتەواوەتی متمانەی خۆی لەدەست داوە.
* راپۆرتەكانی باسی ئەوە دەكەن كە بۆردمانەكانی دوایی سەربازگەكانی حەشدی شەعبی سیناریۆی ناوەخۆیی بووە و ئیسرائیل بۆردمانی نەكردوون، ئەو قسانە تا چەند راستن؟
ئەوانە دەنگۆن و حەشدی شەعبی بڵاوی دەكەنەوە بۆ پاراستنی ئابڕوو و رووڕەشی خۆیان، چونكە هێرشەكانی ئیسرائیل هەموو شتی ئاشكرا كردن، لاوازی و ترسنۆكی و بێتوانایی ئەوان و حكوومەتی عێراقیشی دەرخست، كاریگەری هێرشە ئاسمانییەكان لە رووی سیاسییەوە گەورەتر بوو لە رووی سەربازییەوە، ئەوان بانگەشەی رزگاركردنی قودس و رێپێوانیان دەكرد، ئەوانە هەموو دوای چەند سەعاتێك لە دوای هێرشەكان كۆتایی هات و گەلی عێراقیش بۆی ئاشكرا بوو كە حەشدی شەعبی بەتاڵە و خۆی بە گەورە پێشان دابوو، ئێستە ئەوان ناوێرن بە ئاشكرا ئیسرائیل بەو هێرشانە تۆمەتبار بكەن، لەوكاتەی ئیسرائیل خۆی دانی بەوەدا ناوە. ئەوان لەوە دەترسن كە بەرەیەكی جەنگ لەگەڵ ئیسرائیل بكەنەوە، چونكە باش دەزانن كە ئیسرائیل سزای قوڕسیان دەدات.
پێم وایە ئەوانە تەنیا دەنگۆن و بۆ چاوداخستنی كەسانی سادەی خۆیان، هێرشەكان راستن و ئیسرائیل ئەنجامی داوە وەك بنیامین نەتەنیاهۆ سەرۆك وەزیرانی ئیسرائیل لە چەندان بۆنە دووپاتی لەو هێرشانە و وردەكارییەكانی كردووەتەوە و تەنانەت باسی ئەوەش كراوە كە هێرشەكان بە فڕۆكەی "ئێف35" ئەنجام دراوە، بۆیە هێرشەكان ئەفسانەی بەهێزی و توانای گەورەی حەشدی رووخاند، ئێستە ئەمەریكا بۆردمانی توندی ئاسمانی داعش دەكات و بەوەش دەڵێت بۆ نەهێشتنی داعش پێویست بە حەشدی شەعبی ناكات، ئێستە حەشدی شەعبی بووەتە پەككەوتە، ئێستە لەوكاتەی ئەمەریكا نەهێشتنی تیرۆری عێراق خەریكی نەهێشتنی داعشن، حەشدی شەعبی خەریكی كێشەكانی ناوخۆیی و دزی و هێرشەكانی ئیسرائیلە.