هەرێمی كوردستان سێ دەروازەی فەرمی لەگەڵ كۆماری ئیسلامی ئێران هەیە و هاوكات چەند دەروازەیەكی نافەرمیش هەن، بەڵام وەزیری پلاندانان دەڵێ، بۆ فراوانكردنی پێوەندییە ئابووری و بازرگانییەكان، دەروازەكان فراوانتر دەكرێن و ئەوانەی نا فەرمین بە فەرمییان دەكەین.
ئەمڕۆ سێشەم هەشتی تشرینی یەكەم، دارا رەشید وەزیری پلاندانانی حكوومەتی هەرێمی كوردستان پێوەندییە ئابووری و بازرگانییەكانی نێوان كوردستان و كۆماری ئیسلامی ئێرانی لەگەڵ شاندێكی وەزارەتی دەرەوەی ئێران تاوتوێ كرد.
لە بەیاننامەیەكەدا كە وێنەیەکی دەست "وشە" كەوتووە، وەزیری پلاندانان لەگەڵ دكتۆر ئەنساری جێگری وەزیری دەرەوەی ئێران باسی لە ئاڵوگۆڕی بازرگانی و هاندانی كۆمپانیا ئێرانیەكان بۆ جێبەجێكردنی پرۆژەكانیان لە هەرێمی كوردستان كردووە.
دارا ڕەشید وەزیری پلاندانان، كارنامەی حكوومەتی هەرێمی بۆ شاندی وەزارەتی دەرەوەی ئێرانی روونكردەوە، ئاماژەی بە ئەنجامدانی پرۆژە و پێدانی تەندەر كرد لەسەر بەرزی كوالێت و ئاست و دڵنیایی جۆری كۆمپانیاكان.
ئێران یەكێكە لەو وڵاتانەی بۆ هەرێمی كوردستان لەهەموو روویەكەوە گرنگە
وەزیری پلاندانان دەڵێ، ئێران یەكێكە لەو وڵاتانەی بۆ هەرێمی كوردستان لەهەموو روویەكەوە گرنگە، ئەویش بەهۆی نزیكی سنوور و تێكەڵاوی فەرهەنگ و كولتوور و لایەنە كۆمەڵایەتی و ئابوورییەكان.
بەگوێرەی بەیاننامەكە بێت، هەردوولا تاوتوێی فراوانكردنی دەروازە سنوورییەكان و رێكخستنی مامەڵەی بانكی و هاتوچۆ و ترانزێتی بازرگان و هاووڵاتیان لەنێوان ئێران و هەرێمی كوردستان كرد، وەزیری پلاندانان گوتی "لە هەوڵداین لەگەڵ حكوومەتی عێراق كاری دەروازە سنووریەكان فراواتر بكەین و ئەوانەی نا فەرمین، بە فەرمیان بكەین".
لە بەشێكی تر كۆبوونەوەكەدا، باس لە لابردنی ئاستەنگەكانی بەردەم كۆمپانیا ئێرانییەكان لە هەرێمی كوردستان كراوە، هەردوولا كۆك بوون كە ئەو كێشەیە بەیەكەوە چارەسەر بكەن.