ئەندامێكی لیژنەی دارایی لە پەرلەمانی كوردستان دووپات دەكاتەوە كە پارەی دابەشكردنی مووچە ئامادەیە و حكوومەت دەیەوێ میكانیزمێك بۆ دابەشكردنی بدۆزێتەوە.
ئەمڕۆ چوارشهم 25ی ئادار، ئەرشەد حوسێن ئەندامی لیژنەی دارایی لە پەرلەمانی كوردستان بۆ "وشە" گوتی، حكوومەتی هەرێمی كوردستان پارەی مووچەی ئامادەیە و تەنیا بەدوای میكانیزمێك دەگەرێت بۆ ئەوەی دابەشی بكات و هیچ مەترسی لەسەر ژیانی فەرمانبەران نەبێت.
لە لیژنەی دارایی چەندان پێشنیار خراونەتە ڕوو
" لە لیژنەی دارایی چەندان پێشنیار خراونەتە ڕوو هێشتا نەگەیشتووینەتە رێككەوتن و من باشترین میكانیزم ئەوەیە نوێنەری هەر وەزارەتێك بچێت مووچە وەربگرێت و لە وەزارەتەكان هەر جارە وبەشێك لەفەرمانبەران مووچەكەی وەربگرن بەمەش قەرەباڵغی دروست نابێت" ئەرشەد لۆلانی وای گوت.
ئەو پەرلەمانتارە گوتی، بەهۆی مەترسییەكانی كۆرۆنا و راگەیاندنی قەدەغەی هاتوچۆ حكوومەت دابەشكردنی مووچەی دواخستووە، ئەگینا "پارە ئامادەیە".
لێدوانی ئەو پەرلەمانتارە لە كاتێكدایە كە ئێستە تەنیا وەزارەتی تەندروستی و وەزارەتی ناوخۆ و پێشمەرگە مووچەی مانگی 12یان وەرگرتووە.
هەولێر/ بڵند ئیبراهیم