ئۆدی ئێس چواری 2020 خرایه‌ بازاڕه‌وه‌

:: PM:09:57:30/03/2020 ‌

كۆمپانیای ئۆدی ڕای گه‌یاند، ئه‌مرۆ له‌ پێشانگە تایبه‌ته‌كانی نوێترین ئۆتۆمبێلی له‌ جۆری ئێس چوار نمایش كرد كه‌ راسته‌وخۆ دوای نمایشه‌كه‌ به‌ دنیادا بڵاوی دەکاتەوە.

شاره‌زایان له‌ ماڵپه‌ڕی "caricos" ئه‌وه‌یان ئاشكرا كردووه‌، ئه‌م ئۆدییه‌ نوێیه‌ شێوازێكی زۆر تایبه‌تی هه‌یه‌ له‌گه‌ڵ تایبه‌تمه‌ندی ناوازه‌ و بزوێنه‌رێكی گه‌وره‌ كه‌ وای كردووه‌ ئۆتۆمبێله‌كه‌ لای خه‌ڵك بره‌وێكی زۆری هه‌بێت، سه‌ره‌ڕای ئه‌وه‌یش كۆمپانیاكه‌ گۆڕانكاری زۆری له‌ دیزاینه‌كه‌یدا كردووه‌ له‌ڕووی قه‌باره‌ و له‌ ڕووی بۆدییشه‌وه‌.

ئۆدی ئێس چوار خاوه‌ن بزوێنه‌رێكی 3.0 لیتریه‌ و هێزی 354 ئه‌سپی هه‌یه‌

جگه‌ له‌وه‌یش كۆمپانیاكه‌ باس له‌ بزوێنه‌ر و هێزی ئه‌م ئۆتۆمبێله‌ ده‌كات و ده‌ڵێ، ئۆدی ئێس چوار خاوه‌ن بزوێنه‌رێكی 3.0 لیتریه‌ و هێزی 354 ئه‌سپی هه‌یه‌ و شه‌ش پستۆن و هه‌شت پستۆنیشی هه‌یه‌ و له‌ توانایدا هه‌یه‌ به‌ماوه‌ی 4.4 چركه‌ له‌ سفره‌وه‌ بگاته‌ 100 كیلۆمه‌رتر له‌ سه‌عاتێكدا، ئه‌مه‌یش وایكردووه‌ نرخه‌كه‌ی بگاته‌ 52 هه‌زار و 400  دۆلاری ئه‌مه‌ریكی. 

ئۆدی كۆمپانیایه‌كی ئه‌ڵمانییه‌، تایبه‌ته‌ به‌دروست كردنی ئۆتۆمبێل، ئه‌و كۆمپانیایه‌ سه‌ر به‌ گرووپی كۆمپانیاكانی فۆلكسواگۆنه‌ و مێژووی دامه‌زراندنی كۆمپانیاكه‌یش ده‌گه‌رێته‌وه‌ بۆ ساڵی 1899، به‌ڵام دوای دامه‌زراندن و ده‌ست به‌كاربوونی ئه‌و كۆمپانیایه‌، چه‌ند كێشه‌یه‌كی تووشبوو و نه‌یتوانی كاره‌كانی به‌باشی بكات تا ساڵی 1969 كه‌ له‌و كاته‌وه‌ توانی قازانجێكی زۆر بكات و ئێسته‌یش خاوه‌نی چه‌ندان ئۆتۆمبێلی به‌هێزه‌ و ساڵانه‌ داهاتێكی زۆری هه‌یه‌.


وشە - ڕۆزی عه‌بدولره‌حمان

ئه‌م بابه‌ته 212 جار خوێنراوه‌ته‌وه‌‌