بەرپرسێكی پۆلیسی هەولێر ئاشكرای دەكات، كرێكارێكی بە ڕەگەز كورد كە خەڵكی ڕۆژئاوایی كوردستانە، لە كارگەیەك بەربووەتەوە و گیانی لە دەست داوە.
ئەمڕۆ پێنجشەم 21ـی ئایار، هۆگر عەزیز گوتەبێژی بەڕێوەبەرایەتی پۆلیسی هەولێر بە "وشە"ـی ڕاگەیاند، كرێكارێك بەهۆی بەربوونەوەی لە كارگەیەك، گیانی لە دەست دا.
دوای گەیاندنی بۆ نەخۆشخانە و تێپەڕینی رۆژێك بەسەر رووداوەكەدا، گیانی لە دەست داوە
گوتەبێژی پۆلیسی هەولێر گوتی، كرێكارەكە ناوی عەماڕ موفیدە و تەمەنی 27 ساڵە، لە كاتی كاركردنی لە باڵەخانەی كارگەیەكی جپس كەوتووەتە خوارەوە، دوای گەیاندنی بۆ نەخۆشخانە و تێپەڕینی رۆژێك بەسەر رووداوەكەدا، گیانی لە دەست داوە.
ڕوونی كردەوە، ئەو كرێكارەكە خەڵكی رۆژئاوای كوردستانە و كوردە و دانیشتووی كەمپی قوشتەپەیە لە پارێزگای هەولێر.
باسی لەوەش كرد، ئێستە پەڕاوی لێكۆڵینەوەمان بۆ كردووەتەوە و رادەستی دادوەری لێكۆڵینەوەمان كردووە تا رێكارە یاساییەكان بگرێتەبەر.