دەمەکێ کێم بەری نوکە ل گوندێ بێدوهێ یا سەر ب دەڤەرا بەرواری باڵا ل سنوورێ دەڤەرا ئامێدیێ، شەر دناڤبەرا پەكەكە و قەرەقولەکا سوپایێ تورکیا روویدا، کچەک ل گوندێ ناڤبری برینداربوو.
ژێدەرەکێ ل دەڤەرا بەرواری بالا بو "وشە" گۆت، دەمەکێ کێم بەری نوکە شەر دناڤبەرا پەكەكە و قەرەقولەکا سوپایێ تورکیا ل گوندێ بێدوهێ روویدا.
زێدەتر گۆت "د وی شەری دا کچەک ل گوندێ ناڤبری بناڤێ (د.ع) د ژیێ 13 سالیێ دا برینداربوو، ئەو ل گەل کەسوکارێن خوە هاتیە گوندێ جەژنێ، د نوکە دا ژ ئەگەرێ شەری گوند هاتە چولکرن و خەلکێ وێ ئاوارەبوونە گوند و دەڤەرێن دەورۆبەر".
ئەوی ژیدەری دیارکر ژی کو شەرێ وان ب چەکێ دوشکێ دهاتەکرن و زێدەتر گۆت "گولەیەکا وان ب پیێ ئەوێ کچێ کەفتیە و برینداربویە، د نوکە دا کچ بو نەخۆشخانێ هاتیە رەونەکرن داکو بهێتە چارەسەرکرن".
پێشتر ژی چەندین جاران گوندێ بێدوهێ هاتیە بۆردومانکرن و شەر روویدایە، بەلێ نەهاتیە چولکرن، د شەرێ ڤێجارێ دا گوند هاتە چولکرن.
ئەڤ سالە نێزیکێ 30 جاران سنوورێ پارێزگەها دهۆکێ ژلایێ بالەفرێن تورکیا هاتیە بۆردمان کرن، د ئەنجام دا وەلاتیەکێ دەڤەرێ هاتیە شەهیدکرن و پێنج ژی برینداربووینە.
وشە / دهۆک: