هەوڵ بۆ داگیركردنی ڕووناكی!

(خوێندنەوەی یەك ساڵەی شۆڕشی ژینا)

شۆڕشی ژینا لە حاڵێكدا یادی یەك ساڵەی خۆی دەكاتەوە كە كۆماری ئیسلامیی ئێران سەرەڕای هەموو قەیران و پووكانەوەكانی، لە ناوخۆی خۆیدا هەموو پاڵەپەستۆ و فۆكۆسی خستووەتە سەر كوردستان (ڕۆژهەڵات و باشوور)، لەشكركێشیی ڕەمزی و مانۆڕی ڕەمزیی سەربازیی لە نێوان كەوانەی (ئەگەر و نەگەر)دا هێشتووەتەوە، تا ئێستەش ڕوون نییە وەك هەموو سەرەڕۆیی و كارە پێشێلكارانە و تیرۆریستییە هەرێمی و نێودەوڵەتییەكانی، چ هەنگاوێك هەڵدەگرێت و ئۆپۆزیسیۆنی كوردیی ڕۆژهەڵات چۆن لە ناو گەمە میدیایی و كردەنییەكانیدا بە مەبەستی خۆڵكردنە چاوی خەڵك و سەرنجفڕێنیی ڕای گشتیی جێ دەكاتەوە. 

لە قۆناغی سەرۆك كۆماریی ئیبراهیمی ڕەئیسی كە بە سەرۆك كۆماریی خامنەیی ناسراوە، كۆماری ئیسلامیی زیاتر و زیاتر لە ناوخۆوە قەیرانەكانی قووڵتر بووەوە و ئەم قەیرانە ڕچەشكێن و بێوێنەیە، ڕەوایی و مەشرووعییەتی ڕێبەریی مەرجەعی باڵای كۆمار واتە عەلی خامنەیی، هەم لە ناو مەنزوومەی بیری شیعە لە ناوخۆدا و هەمیش لە ناو مەنزوومەی فیكری ڕەخنەگری ئاینی و غەیری ئاینی، بەتەواوی وردوخاش كرد، ڕای گشتی بەشێوەیەكی ڕەمزی و ناوشیارانە یەك كەس و یەك سەرچاوە بە هۆكاری سەرەكیی هەموو نەهامەتی و داڕمانە گەورەی ئەخلاقی و ئابووری و سیاسییەكان دەزانن، ئەوان بە زۆری لێك هەڵوەشانەوەی بنەمای خێزان و پارچە پارچەبوونی پێكهاتەی كۆمەڵایەتی و هەموو لێكەوتە نەرێنییەكان لە جیۆگرافیای ئێراندا، دەگەڕێننەوە بۆ یەك كەس، ئەویش عەلی خامنەییە!.

 ئەمە ڕەنگە لە خۆیدا و بەڕواڵەت هەڵگری وشیارییەكی فرەڕەهەند نەبێت كە كۆمەڵگەیەكی شۆڕشخواز و گۆڕانخواز پێویستیەتی، بەڵام دەكرێت یەكێك لە نیشانەكان بێت بۆ شكستی گەورەی ئیسلامیی سیاسیی لە مۆدێلە شیعییە ئێرانییەكەیدا كە نموونەیەكی دەگمەن و دژواز لە مۆدێلی سیاسیی و ئایدۆلۆجیكی‌ كاژخەری توندئاژۆیە، كە لە دنیا و ناوچەكە بە هۆكارێكی سەرەكیی تێكدان و ئاژاوەنانەوە بەشێوەی ڕەق و سەربازیی تیرۆریستیی دادەنرێت، بەڵام بەو حاڵەشەوە لە دەرەوە ئەو چاوەڕوانییەی لە كۆمەڵگەی نێودەوڵەتیی دەكرا بۆ هاوكاریكردنی خەڵك، لە نوقمەساركردن و بەر‌اوەژووكردنی ڕژێمێك كە هەر لە سەرەتای هاتنەسەركارییەوە تا ئێستە، خوێنی دەیان هەزار كەس لە هەموو ئایدۆلۆجی و نەتەوەكانی ئێرانی ڕشتووە و سەتان دۆسیە و كەیسی نێودەوڵەتیی لەسەر هەیە، 40 ساڵ زیاترە تاوانی مرۆیی ئەنجام دەدات، نەك بە ئاستی پێویست بەدی نەهات، بەڵكو بەپێچەوانەشەوە كەوتەوە. 

پەرچەكرداری نێودەوڵەتی جگە لە سازش و ددان بەخۆداگرتن هیچی تری نەكرد، لەم نێوانەدا ڕۆڵی ئەمەریكا و وڵاتانی ڕۆژئاوایی لە خراپترین حاڵەتی خۆیدایە، ڕەنگە ئەوانیش وەك كایەكاری ناو پانتای بەرژەوەندییەكانی خۆیان بەهۆی شەڕی ڕووسیا و ئۆكراینا، ئێستە بەگونجاوی نەزانن دەستێوەردان لە جیۆگرافیایەكی ئاڵۆز و لە ناو سیستمێكی بناژۆخوازی گێرەشێوێن بكەن، ئەمە سەرەڕای دەرخستنی دووبارە و چەندبارەی ئەم ڕاستییە كە ئەمەریكا و ڕۆژئاوا، بە كارتەكانی خۆیان بۆ بەرژەوەندیی خۆیان تێدەكۆشن و جاڕنامەی مافی مرۆڤ هەمیشە سەرچاوە و پشتپێبەستراو نییە، ئەم ڕاستییەش بۆ ئێرانییەكان و كوردستان پشتڕاست دەكاتەوە كە ڕزگاركەری ڕاستەقینە تەنیا خۆیانن و بەس، ڕەنگە خودی ئەم دەستێوەرنەدان و موداخەلەنەكردنەی ئەمەریكا (لانیكەم بەشێوە راستەوخۆ و زەقەكەی!) دەستپێكێكی باش بێت بۆ ئەوەی ئێمە هێز و گوتارە ڕاستەقینەكانی ناو جیۆگرافیای ئێران بەبێ ڕووتووش و مەكیاج ببینین، ئاسۆكانی هەر جۆرە مۆدێلێكی سیاسیی داهاتوو بۆمان زیاتر ڕوون ببێتەوە.

 ئەزموونی ململانێی هێزە دژبەرەكانی كۆماری ئیسلامی لەم یەك ساڵە ئەوەی دەرخست كە لایەنی پاشایەتیخواز، ئۆپۆزسیۆنی كوردی و گوتاری نیوەچڵ و دەڵەمەی ئاینیی بەلووچەكان، ئەگەرچی لە جۆرە ململانێیەكی ئاڵۆز و چەند ڕەهەنددان، بەڵام ئامادەن، لە سەرێكی تریشەوە ئەگەرچی چەپەكان بەشێوەی جیاواز لەم ململانێ و كایە گوتارییانەدا بەشدارن، بەڵام ڕاستییەكی تاڵ هەیە ئەویش ئەوەیە ڕای گشتیی خەڵكی ناو جیۆگرافیای ئێران، زیاتر لە ناو هاوكێشەی ناسیۆنالیزم و ئایندا جێگیرە. بێگومان بەشێكی زۆر لە داواكاری و داخوازیی خەڵك، پێوەستە بەو چەمكە و دەستەواژانەی كە چەپەكان كاری پێ دەكەن و بەحەقیش دروستە وەك دادپەرەوەری، ستەمی چینایەتی، مافی دیاریكردنی چارەنووس و ... بەڵام بە هەر هۆكارێكی سۆسیۆلۆجی یان سایكۆلۆجیك بێت، نەتەوەكانی ناو جیۆگرافیای ئێران و لە سەرووی هەموویانەوە كورد، مافی نەتەوەیی خۆیان سەرووتر لە هەر جۆرە خواست و داوایەكی ترەوە دەبینن، ڕەنگە بەهۆی ئەوەی كە كورد گەیشتووە بەم قەناعەتەی دادپەرەوەریی بۆ ئەوان نییە، چونكە هۆكارە سەرەكییەكە هەر كوردبوونیانە، سنوورەكان و جیۆگرافییەكەیان بە تەواوی میلیتاریزە كراوەتەوە، هیچ كارگەیەكی گەورە یان بچووكی لێ نییە (چ ئێستەی كۆمار و چ ئەوسای پاشەیتیخوازەكانی پەهلەوی) كە زەوینە گەشەی ئابووری و باڵاكردنی چینی ناوەڕاست و هەر جۆرە گۆڕانكارییەكی كۆمەڵایەتی یان سیاسی فەراهەم بكات.

كوردبوون لێرە و لە سۆنگەی ئەویدیی ئێرانییەوە، ئامرازێكە بۆ پێشنەكەوتن و بەكرێكارهێشتنەوە و دواخستنە كورد و ئەمە ئەو كەناڵەیە كە دەسەڵات هەژموونی و كۆنترۆڵی خۆی بەسەر كوردستان لە ماوەی 40 ساڵ زیاتر جێبەجێی كردووە، كوردەكان ئەگەر چاو لە پێش كۆماریش دەكەن، هەر كوردبوونیان هۆكاری ئەو ستەم و نادادپەروەرییە بووە كە بە سەریاندا سەپاوە، لایەنی سەڵتەنەتخواز یان پاشایەتیخواز لەم هاوكێشەیەدا ئەگەر بە ویژدانەوە چاوی لێ بكەین، بەو هەموو توانا و تەلەڤزیۆن و میدیا سێبەر و ناسێبەر و پارە خەیاڵییەی بنەماڵەی شا لە بەردەستیان بووه،‌ خراپترین ڕۆڵیان گێڕا، هەم لە كز و لاوازكردنی ڕابوونەكە و هەم خەستتركردنی ڕۆحی فاشیزمی ئێرانی لە ناو هۆگران و لایەنگرانیدا، بۆیە وەك هەندێك شیكاری سیاسیی دەڵێن، دەبێت كۆماری ئیسلامیی مەدالیایەك بدات بە كوڕەكەی حەمەڕەزاشا كە ئاوا كڵپە و بڵێسەی ئاگری شۆڕشی ژینای لەم قۆناغەدا بەرەو ئاقارێكی تاریك برد. 

مەنشووری جۆرج تاون كە بە بەشداریی كۆمەڵیك بەناو ڕەمز و نوێنەری سیاسی و... لایەنگری بزووتنەوەكە پێكهاتبوو، لایەنێكی كوردیش تێیدا بەشدار بوو، هەر بەم هۆكارەوە هەڵوەشایەوە، دانە بە دانەی ئەوانە لە مەنشوورەكە هاتنە دەرەوە و ئەوەی مایەوە هەر هێزە و بە ئاراستەی گوتاری خۆیدا كار دەكات، لە ناو كورددا یەكگرتووییەكی ڕێژەیی هەم لە ئاستی ئۆپۆزسیۆن و هەم لە ئاستی ناوخۆ و ڕای جەماوەر هەیە، بەڵام دەبێت زیاتر و زۆرتر كاری لەسەر بكرێت، ڕاستییەكی تاڵیش هەیە و ئەویش ئەمەیە كە ڕەوتی پاشایەتیخواز هەم بە توانای زۆرترەوە، هەمیش بە پارەی خەیاڵی زیاتر و بە سیستمێكی ڕێكخراو و ڕێكخستنێكی پتەوەوە كار دەكەن، ئەمە ئاسۆی ململانێكە بەرەو ئاقارێكی ترسناك و نادیار دەبات، هەرچی لایەنی پاشایەتیخوازە بە گۆرانیبێژ و ئەكتەر و شرۆڤەكار و سۆزانی و... ئەوانەوە، جگە لە فارس و فارسیزم، هیچ جێیەك بۆ ڕەتكردنەوە و گوتارەكانی تر ناكەنەوە.

 هەر لە سەرەتاوە فۆكۆسی میدیایی و گوتارییان لەسەر گۆڕینی ناوی "ژینا" بۆ "مەهسا" بوو و بەرەبەرە ڕەهەندی ڕەشی ئەم خواستە دەركەوت، ئێستە تەنانەت باسكردن لە زمانی كوردی بە تەجزیەتەڵەبی و جوداخوازیی و دواجار خەیانەت ناو دەبەن، ئەوان تەنانەت ئێستە بە باشووری كوردستایش ناڵێن "اقلیم كردستان (هەرێمی كوردستان)" بە هەڵە یان بە تەكنیكی میدیایی و گوتاریی زۆر جار دەڵێن "اقلیم عراق" واتە هەرێمی عێراق، ئەوەی تۆزێك زمان و گوتاری میدیایی بی بی سی، یورونیوزی فارسی و ئیندیپێندێنتی فارسی و.. بناسێت، وەك ڕۆژی ڕووناك بۆیان دەردەكەوێت كە ئەمانە بە نیسبەت كورد و هەر لایەنێكی تری دەرەوەی بازنەی پاشەیەتیخوازی، ڕێك وەك هەواڵنێرەكانی ئیرنا، ئیلنا، تەسنیم و ئۆرگانە میدیاییەكانی سوپای قودس دەجووڵێنەوە، بۆیە سەرەڕای ئەوەی باس و خواسی زۆر لەمەڕ ئەم شۆڕشە و ئازادبوونی وزە و هێزە جیاواز و جۆراوجۆرە كۆمەڵایەتییەكان هەیە، بەڵام جگە لە كۆماری ئیسلامیی ئێران، ڕەوتی پاشایەتیخواز بە مەترسیدراترین ڕەوت لەسەر ئەم ڕابوونە و بەتایبەتی لەسەر هەر جۆرە خواست و جووڵەیەكی كورد دەجووڵێتەوە.

یەك ساڵ بەسەر كۆچ و هاوكات ڕاپەڕینی ژینا تێپەڕی، لە مانگەكانی سەرەتادا سەرەڕای لافاوی خوێنی گەنجان لە كوردستان و بەشێك لە ئێران، گزنگی هیوا بۆ كۆی جیۆگرافیای ئێران درەوشایەوە، ئێستە پرسیار ئەوەیە ئەو هێزانەی كە هەوڵی داگیركردنی ئەم هیوایە دەدەن، جگە لە كۆماری ئیسلامیی ئێران و خێڵی ڕەزا پەهلەوی واتە سەڵتەنەتخواز كێن؟ ئایا هێز و لایەنی تر لە پشت ئەم كایەیە؟ ئەمە ئەو پرسیارەیە كە تا داهاتوویەكی دوور ڕەنگە وەڵامەكەی نەبینینەوە، بەڵام شتێك كە ڕوونە ئەمەیە ئەو گوتارەی پاشەیەتیخوازەكان پێڕەویی لێ دەكەن، هەمان گوتاری بەعسە كاتێك ئەنفالی دەست پێ كرد لە باشووری كوردستان، دەبێ ئەم زەنگی مەترسییە ببیستین و بیگێڕینەوە!