رهوشا كۆرۆنایێ پارێزگهها دهۆكێ رۆژ بۆ رۆژێ بهر خراپبوونێ دچیت و د نوكه دا پترى 50% ژ تووشبوونیێن كۆرۆنایێ ل ههرێما كوردستانێ دكهڤنه پارێزگهها دهۆكێ، بهلێ كێمترین مرن ب كۆرۆنایێ ل دهۆكێ یه.
ب گورهى ئامارێن رێڤهبهریا گشتى یا ساخلهمیا پارێزگهها دهۆكێ ژ دهستپێكا هاتنا كۆرۆنایێ ههتا نوكه 44 هزار و 706 كهس ل پارێزگهها دهۆكێ تووشى كۆرۆنایێ بوینه و 814 تووشبوویان ژى گیانێ خوه ژ دهستدایه، ئهڤه ددهمهكێ دایه كو ل ههردوو پارێزگههێن ههولێر و سلێمانى كێمتر حالهتێن كۆرۆنایێ و زورترین حالهتێن مرنێ هاتینه توماركرن.
دكتور رهوهند عهبدولخالق، رێڤهبهرێ تاقیگهها مهلبهندى یا دهۆكێ و شارهزایێ پشكنینێن كۆرۆنایێ بۆ "وشه" گۆت، رۆژانه ل سنوورێ پارێزگهها دهۆكێ دناڤبهرا سێ هزار بۆ چوار هزار پشكنینێن كۆرۆنایێ دهێنهكرن و ههموو ژى بێ بهرامبهرن.
زێدهتر گۆت، ل ههموو كوردستانێ ب تنێ ل پارێزگهها دهۆكێ دوڤچونا تووشبویێن كۆرۆنایێ ب active surveillance دهێنهكرن و تووشبوون یان نه ب رێیا sms بۆ وهلاتیان دهێته هنارتن ددهما كێمتر ژ 24 دهمژمێران كو ئهڤ یهك ژى پێنگاڤهكا ههرى باشه و قهرهبالغ دروست نابیت.
ناڤبرى دیاركر ژى كو پشكنین چارهسهریا رهوشا كۆرۆنایێ ناكهت، بهلكو تنێ دهستنیشانكرنه و گۆت ژى، پێشتر مه پێلا ئێكێ یا كۆرۆنایێ دهرباز كر و ب ئانههیا خودێ دێ ئهڤێ پێلێ ژى دهرباز كهین، داتایێن زانستى و حالهتێن مرنێ دێ بریارێ ل سهر وێ یهكێ دهن كا كێ دروستره و كێ پتر خهما خهلكى خواریه.
وهزارهتا ساخلهمیێ یا حوكمهتا ههرێما كوردستانێ د راگههاندنهكێ دا دیاركر كو ژ كوما ئهو ڤاكیسنا گههشتیه ههرێما كوردستانێ و ل سهر بنگههێن دانا ڤاكسینێ هاتینه دابهشكرن تنێ ب رێژا 32% هاتیهدانان، زورترین رێژا دانانا ڤاكسینێ ژى دكهڤیته پارێزگهها دهۆكێ كو ئهو ژى 56% ژ ڤاكسینا بهردهست هاتیهدانان، د بهرامبهر دا ل هەولێرێ 26% و سلێمانی 20% و هەڵەبجە 16% و گەرمیان 39% و ڕاپەرین 42% کۆیە 24%.
رێڤهبهریا گشتى یا ساخلهمیا پارێزگهها دهۆكێ ب رێیا لینكێ وهزارهتا ساخلهمیێ ناڤێ، وان كهسان تومار دكهت كو دخوازن ڤاكسینا دژى كۆرۆنایێ دانن ب تایبهتى کەسێن ل سەر ژیێ 60 سالیێ و ئەوێن نەخۆشیێن دومدرێژ هەین، خانەنشین و دانعەمران و مامۆستایێن پۆلا 12 و هێزێن ئێمناهیێ و ناڤوه و ئاسایش و پێشمەرگە.
ب مهرهما كێمكرنا تووشبوون ب كۆرۆنایێ دهما سێ رۆژایه ل ههرێما كوردستانێ قهدهغهیا گشتى یا هاتن و چونێ هاتیه راگههاندن ژ دهمژمێر 8ێ سپێدێ بۆ 6ێ ئێڤارى و دێ ههتا رۆژا 14ێ نیسانێ 2021ێ یا بهردهوام بیت، خهلكێ پارێزگهها دهۆكێ ب تمام پابهندێ بریارا وهزارهتا نافخویه.