لە ماوەی مانگێكدا لە كەلار، لیژنە هاوبەشەكانی قایمقامییەت، پشكنینیان بۆ سێ هەزار شوێن كردووە و بە هۆی سەرپێچی و پابەند نەبوون بە رێنوێنییەكان، 50 شوێنی كاریان سزا داوە .
قایمقامییەتی شارۆكەی كەلار ناوەندی ئیدارەی گەرمیان ئاماژەی داوە، لە پێناو پاراستنی تەندروستیی هاووڵاتییان و جێبەجێكردنی رێنوێنییەكان، لیژنەكانیان شەو و ڕۆژ سەردان و پشكنین لە سنووری شارۆكەكە دەكەن و هەر سەرپێچكارێك ببینن، سزای دەدەن.
295 هەڵمەتی سەردان و پشكنینیان ئەنجام داوە
بەپێی ئامارێكی قایمقامییەتەكە، لە مانگی تشرینی دووەمی ئەمساڵ، 295 هەڵمەتی سەردان و پشكنینیان ئەنجام داوە و بە گشتی توانیویانە پشكنین بۆ دوو هەزار و 965 شوێن بكەن.
وەك لە ئامارەكەدا هاتووە، هەر لەو ماوەیەدا بەهۆی سەرپێچی و پابەند نەبوون بە رێنوێنییەكان، 43 شوێن بە سزای دارایی دراون و حەوت شوێنی تر داخراون.
بەگشتی 270 كیلۆگرام خۆراكی بەسەرچوو دەستی بەسەردا گیراوە. دوو تۆن و 740 كیلۆگرامیش خۆراكی تێكچوو لەلایەن خاوەن كارەكان رادەستی لیژنە جیاوازەكانی قایمقامییەت كراوە.
گەرمیان/هەژار رەشید