پشتی سەرەدانا سەڕۆک بارزانی بو دەڤەرا ئامێدیێ، ئیک ژ داخوازیێن خەلکی ئەوبو کو دەڤەرێن وان یێن ژبەر شەرێ تورکیا و پەکەکێ هاتینە چولکرن، دوبارە بهێنە ڤەکرن و خەلک ڤەگەریت سەر جهـ و وارێن خوە، ئەڤڕۆ هژمارەک ژ وان دەڤەر و گوندان هاتنە ڤەکرن و خەلک ڤەگەریان وان جها.
بەرەڤان حەمدی، بەرپرسێ لقێ 18ێ پارتی ل ئامێدیێ دیارکر کو وەک ئاماژەیەک بۆ دەستپێکا ڕەوشەکا جودا و قوناغەکا نوێ، چەند مزگینی گەهاندن وەلاتیان و گوت، ب ئومێدێن کو ب گورەی حەز و خواستێن خەلکێ کوردستانێ ب گشتی و دەڤەرێ بتایبەتی دێ پێنگاڤێن باش هێنە هاڤێت، د نوکە دا رێیا بەرێسلێ و چەند گوندێن بەرگارێ وەک ئاماژەیەک بۆ هەبوونا هەمان پلان و بەرفرەهتر بۆ دەڤەرێن دن ب گشتی کو دخزمەتا هەمی پێکهاتێن دەڤەرێ دا بیت و پتر ناوچەیێن مە پێکڤە بهێنە گرێدان و بۆ گەشەکرن و وەرارێ ل هەمی سکتەران و تایبەت کشتوکال و گەشت وگوازێ، هەر دیسان ئاماژەیە بۆ دەسپێکا قوناغا خوشگوزەرانیا وەلاتیان ب گشتی و ئاڤەدانیەکا بەرفرەهتر و خزمەتگوزاریێن ژ هەژی هەمی کوردستانییان و زێدەبوونا دەرفەتێن کاری، پشتی ڕێککەفتنا هەردوو حکومەتێن هەرێمێ و بەغدا سەبارەت موچە و بودجێ و سەرەدانا مەسروور بارزانی، سەروکێ حکومەتا هەرێما کوردستانێ و ل دویڤدا محەمەد شیاع سودانی، سەروکوەزیرێن عیراقێ بۆ ئەمریکا.
زێدەتر گوت، بونیاتنان و جێبەجێکرن و ڤەکرنا پروژا ل دەڤەرێ بەردەوامی هەیە و دخوازین کو خەلکێ مە ژی پتر پێگریا رێنمایان بکەن دا پێگڤە باشتر خزمەتا سنورێ وارگەهێ خوە بکەین.
ئەو گوندێن بەرێ گارێ چەند گوندەکن ژ وانان، سپیندارێ، مژێ، دیسان سەیرانگەهـ و گوندێن سەرێ ئامێدیێ مینا بەرێ سیلێ و دەورۆبەران هاتنە ڤەکرن و ژ ئەڤڕۆ وێفە ب گورەی ڕێنما خەلک دشێن بچنە سەر گوندەوارێن خوە و مفای ژ چاندن و گەشتوگۆزار و رەز و بیستانێن خوە ببینن.
ژبلی گوند و جهێن سەری،هەڤدەم رێیا گوندێ کێستە بو سیلاڤێن وێ ژی ل سنورێ ناحیا کانی ماسێ هاتنە ڤەکرن.
پشتر ژی رێیا سەرەکی یا گەلیێ بالندا هەتا نێزیکێ اڤا مارک، هێزێ پاسەوانێن سنوری چوینێ و بریارە ل نێزیک هەمبەر وەلاتیان ژی بهێتە ڤەکرن.
ل سنورێ دەڤەرا ئامێدیێ نێزیکێ 400 گوندان هاتینە چولکرن و خەلک دخوازیت جارەکا دی هەمبەر واندا گوندێن وان هێنە ڤەکرن.