لە چوارچێوەی سەردانەكەیدا بۆ عێراق، ئێوارەی ئەمڕۆ رەجەب تەیب ئەردۆغان سەرۆك كۆماری توركیا سەردانی هەولێر دەكات و لەلایەن بەرپرسانی باڵاوە، لە فڕۆكەخانەی نێودەوڵەتیی پایتەخت پێشوازی لێ دەكرێت.
تا ئامادەكردنی ئەم هەواڵە و بەگوێرەی ئامادەكارییەكانی پرۆتۆكۆڵ، نزیكی سەعات حەوت بۆ 7:30ی ئێوارە، ئەردۆغان دەگاتە هەولێر و سەرەتای كۆبوونەوەكانی لەگەڵ مەسروور بارزانی سەرۆك وەزیرانی كوردستان دەبێت.
دواتر ئەردۆغان دەچێتە سەرۆكایەتیی هەرێمی كوردستان و لەگەڵ سەرۆكی هەرێم، بە ئامادەبوونی مەسروور بارزانی سەرۆك وەزیرانی كوردستان كۆبوونەوەیەكی فراوان بەڕێوە دەچێت.
بۆ سەعات 8:30 ئامادەكاری بۆ ئێوارەخوانێك كراوە كە لە سەرۆكایەتیی هەرێمی كوردستان بەڕێوە دەچێ.
ئەردۆغان ئەمڕۆ سەردانی بەغدای كرد، لەگەڵ سوودانی سەرۆك وەزیرانی عێراق لە كۆنگرەیەكی رۆژنامەوانی گوتیان، 24 رێككەوتنی هاوبەشیان واژوو كردووە.