كچە ڕۆژنامەنووسێكی شاری سلێمانی بەهۆی نەخۆشییەوە بەرەبەیانی ئەمڕۆ گیانی لە دەست دا كە كاری فۆتۆگرافی دەكرد بۆ دەزگەكانی ڕاگەیاندن.
ئەمڕۆ چوارشەم 20ـی ئەیلوول/ سێپتێمبەر، لقی سلێمانی سەندیكای ڕۆژنامەنووسان لە هەواڵێكدا رای گەیاندووە كە بۆ "وشە" هاتووە، بەخەم و پەژارەیەكی زۆرەوە هەواڵی كۆچی دوایی ڕۆژنامەنووس و وێنەگری لێهاتوو خاتوو ئەژین قادر ڕاگەدەیەنین.
لە بەشێكی هەواڵەكە هاتووە، بەرەبەیانی ئەمڕۆ 20/9/2017 ئەژین قادر ماڵئاوایی لێ كردین كە ناوبراو وێنەگرێكی كارامە و لێهاتوو بوو، بەچەند ساڵێكی كەم توانی شوێنی خۆی لە بواری فۆتۆگراف و دنیای ڕۆژنامەوانیدا بكاتەوە.
لە كۆتای هەواڵەكە هاتووە، جارێكی تریش ئێمە زۆر بەداخین بۆ لەدەستدانی ئەو رۆحە پەپوولەئاسایە و هیوادارین بەهەشتی بەرین دوا مەنزڵگەی بێت، ئەمەش دوا كۆستی ئێمەی ڕۆژنامەنووسان و بنەماڵەكەی ئەژین بێت.
ئەژین قادر بەهۆی بوونی وەرەمێك لە مێشكی، لە نەخۆشخانە گیانی لە دەست دا كە ماوەیەك بوو بە دەستیەوە دەیناڵاند.