نێچیرڤان بارزانی: دەستووری كوردستان گرەنتی بە پێكهاتەكان دەدات
سەرۆكی حكوومەتی هەرێمی كوردستان ڕای گەیاند، ئامانجی كورد زۆر ڕوونە لە ئەنجامدانی ڕیفراندۆم كە بڕیارە 25ی ئەیلوول ئەنجام بدرێت.
ئەمڕۆ چوارشەم 20ی ئەیلوول، نێچیرڤان بارزانی سەرۆكی حكوومەتی هەرێمی كوردستان لە میانەی چاوپێكەوتنێكی هاوبەش لەگەڵ بەشێك لە كەناڵەكانی ڕاگەیاندن گوتی، بڕیاری ئەنجامدانی ڕیفراندۆم دوابەدوای ئەوە هات كە گەلی كوردستان لە مامەڵەی لەگەڵ حكوومەتی عێراق بێ هیوا بوو، بەڵام ئەگەر كۆمەڵگەی نێودەوڵەتی بەدیلێكی باشتر لە ڕیفراندۆم پێشكەشی گەلی كورد بكات، ئەوە ئاسایییە ڕیفراندۆم دوا بخرێت
سەرۆكی حكوومەتی هەرێمی كوردستان زیاتر گوتی، ئامانجی كورد زۆر ڕوونە لە ئەنجامدانی ڕیفراندۆم كە بڕیارە 25ی ئەیلوول ئەنجام بدرێت و لە دەستووری داهاتووی دەوڵەتی كوردستاندا، گرەنتی دەدەین بە پێكهاتەكان كە مافەكانیان دەپارێزرێت.
سەرۆكی حكوومەتی هەرێمی كوردستان دووپاتی كردەوە كە ڕیفراندۆم مانای داخستنی دەرگەی گفتوگۆ نییە لەگەڵ بەغدا، جارێكی تر پرسی كورد و چۆنیەتی چارەسەركردنی كێشەكان لە رێی ریفراندۆمەوە هێنراوەتە سەر مێزی وڵاتانی زلهێز.
حەوتی حوزەیران/یۆنیۆی 2017 لە كۆبوونەوەی مەسعوود بارزانی سەرۆكی هەرێمی كوردستان لەگەڵ لایەنە سیاسییەكان و حكوومەتی هەرێم و كۆمسیۆنی باڵای هەڵبژاردنەكان، ڕۆژی 25ی ئەیلوول/سێپتەمبەری وەك ڕۆژی ڕیفراندۆمی كوردستان بۆ "مانەوە یان جیابوونەوە لە عێراق" دیاری كرد. خەڵكی كوردستان لە ناوخۆ و دەرەوە بە تاك و كۆمەڵ بە جۆری جیاواز خۆشحاڵی دەردەبڕن.
وشە -
سه‌رخێڵ هاشم