هاوردەكردنی نەوت لە هیندستان بۆ نزمترین ئاستی لە ماوەی چوار مانگی رابردوو دابەزی. كۆی قەبارەی ئەو بڕە نەوتەی هیندستان هاوردەی كردووە لە ماوەی چوار مانگدا، بریتی بووە لە 40 ملیار و 290 ملیۆن دۆلار و بەراورد بە هەمان ماوەی ساڵی رابردوو 9% دابەزیوە كە هێمایە بۆ دابەزینی چالاكی پیشەسازی لەم وڵاتە.
هیندستان كە بە سێیەم گەورەترین ئابووری ئاسیا هەژمار دەكرێت و خاوەن پیشەسازییەكی بەهێزە، كەمبوونەوەی هاوردەی نەوت بە واتای سستبوونی چەرخی پیشەسازی دێت و كاتێك بەرهەمهێنان لەو وڵاتە كەم دەكات، نیشانی دەدات ئابووری پاشەكشەی كردووە.
لە چەند مانگی رابردوودا قەبارەی فرۆشتنی ئۆتۆمبێل، بەرهەمی پێترۆكیمیایی و كاڵاكانی بازرگانی دابەزیوە و ئەمەش خۆی نیشانەیەكی ترە لە پاشەكشەی ئابووری لەو وڵاتە.
تەنیا لە مانگی رابردوودا هاوردەی نەوت لە هیندستان بە رێژەی سەرووی 13% دابەزیوە و بە قەبارەی 11 ملیار دۆلار نەوت هاتووەتە كڕین، ئەمە لە كاتێكدایە هاوردەكردنی زێڕ بە رێژەی 13% بەرز بووەتەوە و بایی دوو ملیار و 700 ملیۆن دۆلار هاتووەتە كڕین.
بەگوێرەی "
فارسنیوز" جگە لە دابەزینی هاوردەی نەوت، هەناردەی بازرگانیش لەم وڵاتە بە رێژەی 9% دابەزیوە و قەبارەكەی دەگاتە سەرووی 25 ملیار دۆلار.
جەنگی ئابووری نێوان ئەمەریكا و چین گرنگترین هۆكاری ئەم دۆخەیە كە باڵی بەسەر ئابووری دنیادا كێشاوە.