سووتاندنی گەنمی جووتیاران لە مەخموور بەردەوامە و ژمارەیەكی زۆری جووتیار زیانیان پێ گەیشتووە. فەرماندەیەكی پێشمەرگەش ئاشكرای دەكات كە كێ لە پشتی ئاگرتێبەردانەكانە.
لیوا زریان شێخ وەسانی فەرماندەی هێزەكانی پێشمەرگە لە سنووری مەخموور بۆ "وشە" گوتی، زۆربەی گەنم و دەغڵودانی جووتیاران لە سنووری مەخموور سووتێنراون، هاوكات وێڕای وەرگرتنی سەرانە، دەست بە رفاندنی هاووڵاتیانیش كراوە.
هەرچەندە حكوومەتی عێراق هێزێكی رەوانەی ناوچەكە كردووە، بەڵام هیچ كاریگەری نەبووە و بەگوتەی ئەو فەرماندەیەی پێشمەرگە، داعش بەئارەزووی خۆی لە ناوچەكە جموجووڵ و هاتوچۆی هەیە.
داعش لە گوندەكان و ناوچەكانی تر خۆیان حەشار داوە و بەئارەزووی خۆیان دەجووڵێنەوە
وەك زیاتر خستیەڕوو، تیرۆریستانی داعش لە گوندەكان و ناوچەكانی تر خۆیان حەشار داوە و لەو ناوچانە بەئارەزووی خۆیان كار دەكەن، چونكە هیچ هێزێك نییە رێگرییان لێ بكات.
لیوا زریان ئاماژەی دا جگە لە سووتاندن، داعش سەرانە لە كێڵگەی پەلەوەر و حەوزی ماسی و خاوەن دەڕاسە و جووتیاران و خاوەن كارگەكان وەردەگرێت و خەڵكیش لە ناچاریدا سەرانە دەدەن، چونكە ئەگەر نەیدەن دەكوژرێن و ئاگر لە بەرهەمەكانیان بەردەدرێت.
هەولێر/بڵند ئیبراهیم