من هیچ لە مەلا بەختیار تێناگەم، ڕۆژێك فوول مسوڵمانە، ڕۆژێك فوول مولحیدە، نازانی لەسەر دینی محەمەدە، دینی عیسایە، مووسایە، لەسەر ئاینی ماركس و لینینییە، چەپە، سیكۆلارە، دیندارە، بێ دینە، دنیاییە، قیامەتییە، وەلحاسڵی كەلام هەر وا دەكەی تەقولبابم لێ دەكاو دەڵێ یان كرێ زیاد كە یا چۆلی كە
_ مەلا بەختیاری ساحێب خانوومان دەڵێم.
ئاگادار بە، ئەگەر لە کاتی قسەكردنتدا هاوڕێكەت زەین و هۆشی لای تۆ نەبوو، لێوەكانی خونچە كردبوو، چاوەكانی بەدیار شاشەی مۆبایلەكەیەوە دەرپۆقیبوو، شاگەشكەیی پێوە دیاربوو، ئەوا بزانە تۆی خستتووەتە تەڵەو خەریكە قسەكانت ڕیكۆرد دەكات و هەرچیت گوتووە هەمووی تۆمار كردووە. لە بیرت بێ ئێمە لە سەردەمی تەكنەلۆژیا و خیانەت و بێ وەفاییدا دەژین.
كورد وایە، هەركە مانگی ڕەجەب هات بەسەر شەعباندا باز دەدا و پێشوازی لە مانگی ڕەمەزان دەكات، كە ڕەمەزانیش هات و گەیشتە نیوەی، گۆرانیەكەی ئەلویداعی بۆ لێدەدا و ماڵئاوایی لێ دەكا.
ئەگەر رۆژێك لە هەولێر خۆپیشاندان بكرێ، ئەوا دەبێتە هەواڵ
ئەگەر ڕۆژێك لە سلێمانی خۆپێشاندان نەكرێت، ئەوا دەبێتە هەواڵ
_ لە وتەكانی ئیفلیج پاشای ڕۆشنبیریی_
زۆرن ئەوانەی بۆ گوزەرانی ژیانی دنیایان مووچەخۆری حزبێكی عەلمانیین و بۆ قیامەتیشیان هاوسۆزی حزبێكی
ئیسلامیین.
پێكەوەژیان لە چێشتی مجێور دەچێ. كفتەو دۆڵمە و ترش و برنج و قەرەخەرمان و شۆربانیسك و ئەنواعی چێشت لەناو یەك مەنجەڵدایە، كەچی نە لە تام و نە لە شێوە وێك ناچن و قەتیش تێكەڵ نابن.
لە ماڵی خۆیان نۆ كەسن و هەر نۆ كەسیان هەریەكەو مۆبایلی خۆی هەیە و لەگەڵ هەموو فەرزێكدا هەر نۆ مۆبایلەكە دەبێتە گەڕەلاوژێیان و لەگەڵ مەلا، هەریەكە و بە ئاوازێك بانگ دەدەن، كەسیشیان نوێژ ناكات.
لانیكەم هەفتەی جارێك لە چێشتخانەكەی سێڕیانی (هەولێر-بەغدا-سلێمانی) ڕێكەوتی یەكدی دەكەن. شاندی مووچەی ئەمان لە بەغداوە بەرەو هەولێر دێتەوە و، سەرۆك حزبی ئەوان لە سلێمانییەوە بەرەو بەغداد دەچێ.
-ته‌یف سامی، مردووی مرێ، هێندەی ڕادەكێشێ، ئای بیلامەعنا درێژ دەبێتەوە، ئای درێژ دەبێتەوە.-مانگ-ی مووچە دەڵێم
- سەرۆك كۆماری ئێستەی عێراق خراپ دەركەوێ، پارتییە
باش دەركەوێ، یەكێتییە
شێوەی داڕشتنی هەواڵەكان وا دەڵێ.