پەلەقاژەی یەكێتی

باڵی خیانەتكار قێزەونترینن

ئۆدۆڵف هیتلەر رێبەری نازییەكان بۆ ئەو كەس و لایەنانەی وەك جاسووس و بەكرێگیراو و خیانەتكار لە دژی نەتەوە و نیشتمانەكەیان كاری بۆ دەكردن، گوتە و پێناسەیەكی جوانی جێ هیشتووە، لە یەكێكیاندا دەڵێ "قێزەونترین ئەو كەسانەی بینیبێتیانم ئەوانە بوون كە یارمەتی ئێمەیان دا بۆ داگیركردنی وڵاتەكانیان". ئەمە ئێستە رێك بۆ یەكێتیی نیشتمانیی كوردستان و باڵی خیانەتكاری 16ی ئۆكتۆبەری ماڵی برایم ئەحمەد و تاڵەبانی دروستە. 

بنەماڵەی تاڵەبانی و برایم ئەحمەد بە ئەنجامدانی خیانەتی 16ی ئۆكتۆبەر ویستیان كۆمەڵێك چۆلەكە بە بەردێك بكوژن، یەك دوو چۆلەكەیان پێكا، بەڵام لە ناكاو بەردەكە بەڕووی خۆیاندا كەوتە خوارەوە و بۆ تاهەتایە شەرمەزاری میلەت بوون، ئەوەتا هێشتا ساڵێك بەسەر خیانەتەكەدا تێنەپەڕیوە، یەكێتی و سەركردەكانی بە هەردوو باڵ و بنەماڵەوە پەلەقاژەیانە و لە بری وەرگرتنەوەی تەواوی پاداشتەكەیان، ئێستە سەرانی دەسەڵاتدارێتی شیعە كەوتوونەتە گیانی یەكێتی و باڵی خیانەتكاری تاڵەبانی و برایم ئەحمەد و لە تەواوی سنووری پارێزگەی كەركووك، دەردەكرێن.

بەیاننامەكەی مەڵبەندی دووی كەركووك

لە چەند رۆژی رابردوو، بەیاننامەی مەڵبەندی دووی یەكێتی لە كەركووك كە بەرپرسەكەی لە گرووپی خیانەتكاری 16ی ئۆكتۆبەرە و هەڵسووڕێنەرەكانی ئەو مەڵبەندە بەشداری سەرەكیی ئەو خیانەتە گەورەیەن. داوا دەكات هێزی پێشمەرگە بگەڕێتەوە كەركووك بۆ پاراستنی تەناهیی شارەكە و بە قسەی ئەوان دۆخی تەناهیی كەركووك "لەوپەڕی خراپیدایە"، كە لە بنەڕەتدا ئەو داواكارییە هی بنەماڵەی خیانەتكارانە. 

سەرۆكی فراكسۆنی یەكێتیش لە بەغدا لە بەیانێكی رەسمیدا دەڵێ، "بە هەموو لایەكی رادەگەیەنین تا سەر بەرانبەر رەوشی ئەو ناوچانە بێ دەنگ نابین" مەبەستی ناوچەكانی دەرەوەی ئیدارەی هەرێمی كوردستانە. 

بە كورتی ئەو پەلەقاژەی یەكێتی و باڵی خیانەتكار، زەنگی كۆتاییهاتنیانە لە بەغدا و لە كوردستانیش، بە تایبەت لە كەركووكی كوردستانی، هەموو پاداشتی شیعە بۆ یەكێتی چەند كورسییەك بوو. بەغدا دوای ئەوەی جڵەوی تەواوی بەسەر كەركووك و ناوچەكانی دەرەوەی ئیدارەی هەرێمدا گرتە دەست، ئێستە سەرقاڵی پاكتاوكردنی تەواوی یەكێتییە لەو ناوچانە. لە هەرێمی كوردستانیش دیسان بە تەنیا ماوەتەوە، دەركەوت خەڵكی كوردستان چۆن قێزیان لێ دەبێتەوە، بۆیە لە هەڵبژاردنی رابردوو بۆ سپیكردنەوەی روویان پەنایان بۆ ساختەكاری برد، ئەگەر نا یەكێتی و بە دەستهێنانی زۆرینەی دەنگەكانی شارۆكەیەكی وەك حەویجە، دووجار مەرحەبا. 

یەكێتی لە ناوخۆی كەركووكیش نەك تەنیا كورد، بەڵكو كەوتوونەتە بەر نەعلەتی عەرەب و توركمانیش، بۆیە یەكێتی كەركووك داوا لە حكوومەتی هەرێم دەكات بە هانای كەركووكییەكانەوە بێن، ئێستە وردە وردە یەكێتی باجی خیانەتەكەیان دەدەنەوە، بنەماڵەی تاڵەبانی و برایم ئەحمەد برینێكیان لە جەستەی كوردستان دروست كرد، بە ئاسانی سارێژ نابێت، خەڵكی كوردستانیش بە ئاسانی لە باڵی خیانەتكاران خۆش نابن، بەڵكو تۆڵەیان لێ دەكەنەوە. 

ئێستە ساتی تۆڵەكردنەوەیە لە باڵی خیانەتكاران لە بەرانبەر فرۆشتنی %51ی خاكی كوردستان بە عەرەب لە بەرانبەر چەند كورسی و بیرەنەوتێك، چەند مانگی ئایندە بە بەرچاوی خۆمان دەبینین یەكێتی بە چ شێوەیەك تۆڵەیان لێ دەكرێتەوە، فرۆشتنی خاكی كوردستان بە دوژمن خیانەتێك نییە ئەوەندە بە ئاسانی بكەوینە ژێرباری، مەگەر بنەماڵەی تاڵەبانی و برایم ئەحمەد نەبێت.

كۆتاییهێنان بە هەژموونی بەغدا

لێرەدا گرنگە سەركردایەتی سیاسیی كورد بەپێی پیلانێكی ستراتیجی، "بێ بەشداری یەكێتی، چونكە یەكێتی چەند گرووپێكی ناكۆكە، بە هەڕەشەی تێكدانی دۆخی كوردستان خۆی سەپاندووە، بگرە ترس و دڵەڕاوكێی لای زۆرینەی خەڵك و هێزە سیاسییە كوردستان دروست كردووە، بەهەر جۆر و نرخێك بێ، كۆتایی بەو خۆسەپێنییەی یەكێتی بهێنرێ" هاوكات كار بۆ كۆتاییهێنان بە هەژموونی بەغدا لە كەركووك و ناوچەكانی دەرەوەی ئیدارەی هەرێم بكات، كەركووك و ئەو ناوچانە بگەڕێنێتەوە دۆخی بەر لە 16ی ئۆكتۆبەر، چونكە هەژموونی كورد لە كەركووك واتە بەهێزبوونەوەی كورد لە بەغداش، كەركووك خاڵی بەهێزی هەستانەوەی كوردە لە عێراق، بەبێ كەركووك كورد ناتوانێ لە بەغداش بەهێز ببێتەوە، لەگەڵ ئەوەشدا لاوازكردنی دەسەڵاتی شلۆقی بەغدا لە كەركووك، گەڕانەوەی پێگە و قورسایی كورد لە بەغداش بەو پەرتەوازیییەی ئێستەی هێزە كوردستانییەكان نابێت. 

بۆیە باشترین بژاردە دوورخستنەوەی یەكێتی بە تایبەت باڵی تاڵەبانی و برایم ئەحمەد لەناو گۆڕەپانی سیاسیی هەرێم، ئینجا وردە وردە هەژموونی بەغدا لە كەركووك كۆتایی پێ دێت، كورد دیسان بە بەهێزییەكەی جارانەوە دێتەوە كەركووك و پاشان پەل بۆ بەغداش دەهاوێژێت.