روانگەی سووری بۆ مافی مرۆڤ ئەمڕۆ رای گەیاند، چەكدارانی رێكخراوی تیرۆریستی داعش لە ناوچەی رەقە، لە بۆسەیەكدا 11 كەسیان كوشتووە كە بۆ كۆكردنەوەی گژوگیای بەهاری لەو ناوچەیەدا بوون.
پێگەی "
شەفەق نیوز" ئەمڕۆ دوووشەم 25ی ئادار بڵاوی كردووەتەوە، بەپێی بەیاننامەكەی روانگەی سووری بۆ مافی مرۆڤ، چەكدارانی داعش لە دەوروبەری شاری رەقە، لە بۆسەیەكدا بۆمبیان بە ئۆتۆمبێلێكدا تەقاندووەتەوە و بەهۆیەوە 11 كەس كوژراون.
باس لەوە دەكرێ ئەوانەی لەناو ئۆتۆمێلەكەدا بوون، سەرجەمیان خەڵكی سڤیل بوون و بۆ كۆكردنەوەی گژوگیای بەهاری روویان لەو ناوچەیە كردووە. دوای چەكداران ئەوەی ئۆتۆمبێلەكەیان تەقاندووەتەوە، دواتر دەستڕێژیان لێ كردوون و 11 كەسیان كوشتووە و سێ كەسی تریشیان رفاندووە.
وێڕای ئەوەی هێزەكانی تەناهیی وڵاتەكە بەردەوام هۆشداری دەدەنە خەڵك كە روو لەو ناوچانە نەكەن، بەڵام لە وەزری بەهاردا خەڵكێكی سڤیل و تەنانەت سەربازانیش، بۆ كۆكردنەوەی گژوگیای بەهاری، روو لەو ناوچەیە دەكەن كە ناوچەیەكی بیابانییە و خەڵكی ناوچەكەیش بەگشتی بژێویی ژیانیان باش نییە، بەتایبەتی لەوەتەی 13 ساڵی بەرلە ئێستە دۆخی وڵاتەكە تێكچووە.