ئەمڕۆ كۆنگرەی 14ی پارتی دیموكراتی كوردستان لە شاری دهۆك بەڕێوە دەچێت، بڕیارە سێ رۆژ بخایەنێت، كۆنگرەی پارتی هاوشێوەی رووداوێكی گرنگی عێراق سەیر دەكرێ، چونكە ئەو حزبە ئێستە لەسەر ئاستی عێراق و كوردستان خاوەن زۆرترین كورسیی پەرلەمانتارییە.
ئەمڕۆ پێنجشەم سێی تشرینی دووەم، لە شاری دهۆك 14مین كۆنگرەی پارتی دیموكراتی كوردستان ئەنجام دەدرێ، لە رابردوودا پارتی دیموكراتی كوردستان 13 كۆنگرەی بەستووە و یەكەم جاریشە كۆنگرەی خۆی لە سنووری دهۆك دەبەستێت، ژمارەی ئەندامانی كۆنگرەی پارتی نزیكەی هەزار ئەندامە.
پارتی دیموكراتی كوردستان بەهۆی پێگە جەماوەرییەكەی لە ناوچەكە و عێراق، هەموو سەرنجەكان لەسەر ئەو حزبە و دواین گۆڕانكارییەكانیەتی، بەڵام هەمووانیش دەزانن بابەتی خاك و دیموكراسی و ئازادی لە بەرنامەی پارتیدا نەگۆڕن.
دواین كۆنگرەی پارتی لە ساڵی 2010 بەسترا، بەپێی پێڕەوی ناوخۆی ئەو حزبە، دەبێت هەر چوار ساڵ جارێك كۆنگرە بكرێت، بەڵام بەهۆی شەڕی داعش و پەتای كۆرۆنا، كۆنگرەی 14ی پارتی دواكەوت.
پارتی دیموكراتی كوردستان لە ساڵی 1946 لە ژێر دروشمی "یان كوردستان یان نەمان" لەلایەن مەلا مستەفای بارزانی دامەزراوە و دەستی بە خەبات كردووە. بەدرێژایی تەمەنی ڕۆڵی گرنگی لە شۆڕشی رزگاری خوازی كورد بینیوە.