یانەی لێڤەرپوولی ئینگلیزی دڵنیایی دایە هاندەرانی تیپەكەی بە باشی تەندروستی هێرشبەرە بەڕازیلییەكەی رۆبێرتۆ فێرمینیۆ كە دوێنێ شەموو لە یارییەكەی بەرامبەر یانەی تۆتنهام تووشی پێكانێكی قورسی چاوی ببووەوە.
دوێنێ شەموو یانەی لێڤەرپوول لە گەڕی پێنجەمی خولی نایابی ئینگلیزی لەنێو یاریگەی وێمبڵی بووە مێوانی یانەی تۆتنهام و یارییەكەشی بەئەنجامی 1-2 گۆڵ لێ بردەوە.
لە یارییەكەدا فێرمینیۆ تووشی بارێكی مەترسیدار ببووەوە كاتێك پەنجەی دەستی یاریزانێكی یانەی تۆتنهام كەوتبووە نێو چاوییەوە و بەهۆیەوە هەوادارانی یانەكەی ترسیان لە تەندروستی ئەو هێرشبەرەیان نیشتبوو.
لەمبارەیەوە ماڵپەڕی فەرمی یانەی لێڤەرپوول بڵاوی كردەوە كە باری تەندروستی فێرمینیۆ باشە و بەدڵنیایشەوە بەشداری لە یاریی سێشەمی داهاتوو لە خولی پاڵەوانانی ئەوروپا دەكات بەرامبەر یانەی پاریس سان جێرمانی فڕەنسی.