ئەمڕۆ چوارشەم 21ی تشرینی دووەم، مەسروور بارزانی راوێژكاری ئەنجوومەنی ئاسایشی هەرێمی كوردستان پێشوازی لە ڤیكتۆر نیدۆپاس باڵوێزی ئۆكرانیا لە عێراق و شاندی یاوەری كرد.
لەو كۆبوونەوەدا پەرەسەندنە سیاسییەكان و پێوەندی مێژوویی نێوان هەردوو گەلی كوردستان و ئۆكرانیا تاوتوێ كرا، پێداگری لە فرەوانكردنی ئەو پێوەندییانە بەتایبەتی لە بوارەكانی ئاسایش و بازرگانی و وەبەرهێناندا كرایەوە.
مەسروور بارزانی هیوای بەرەوپێشبردنی زیاتری پێوەندییەكانی خواست و هانی باڵوێزی ئۆكرانیای دا لە میانەی بوونی دیپلۆماسییان لە هەولێر كار بۆ دامەزراندنی پێوەندییەكی بەهێز بكات كە لەبەرژەوەندی هەردوولادا بێت.
پێوەندییەكانی نێوان هەولێر و بەغدا تەوەرێكی تری دیدارەكە بوو، لەوبارەوە راوێژكاری ئەنجوومەنی ئاسایشی هەرێمی كوردستان لە چوارچێوەی دەستوور و هاوبەشی راستەقینە لە بەڕێوەبردن و بڕیارەكاندا هیوای دەستپێكردنی قۆناغێكی نوێی پێوەندییەكانی لەگەڵ حكوومەتی نوێی عێراق خواست و رای گەیاند، چاومان لەوەیە قۆناغی سەخت و دژواری پێوەندییەكان تێپەڕێت كە پێشتر هەبوو.