لە سلێمانی رێژەی لە دایكبوونی منداڵ بە نەشتەرگەری گەیشتووەتە سەرووی رێژەی ستانداری جیهانی و بەڕێوەبەری تەندروستی شارەكەیش دەڵێت، دەیانەوێت ئەو حاڵەتە كەم بكەنەوە و رێگری بكەن لە زیاتر تەشەنەكردنی.
ئەمڕۆ پێنجشەم 16ی ئایار، سەباح هەورامی بەڕێوەبەری گشتی تەندروستی سلێمانی بە "وشە"ی راگەیاند، رێژەی لە دایكبوونی منداڵ بە شێوازی نەشتەرگەری لە نەخۆشخانە ئەهلییەكان زیادی كردووە و ئەوەیش مەترسیدارە بۆ ژنان.
روونیشی كردەوە كە بە گشتی لەم سەردەمەدا هەر ژنێك كەمنداڵی دەبێت بە ویستی خۆی یان كەسوكاری داوای نەشتەرگەری دەكات و لە دایكبوونی سروشتی زۆر كەمبووتەوە و ژنانیش لە گرنگییەكەی نازانن.
لای خۆیەوە شلێر فایەق بەڕێوەبەری نەخۆشخانەی منداڵبوونی سلێمانی بە "وشە"ی راگەیاند، ڕێژەی منداڵبوون بە نەشتەرگەری لە سلێمانی ئێستە 46%ی تێپەڕاندووە كە بەپێی ستاندەر نابێ لە ساڵیكدا نەشتەرگەری منداڵبوون 20% تێپەڕێنێت.
ئاماژەی بۆ ئەوەیش كرد، زیادبوونی منداڵبوون بە نەشتەرگەری پێوەستە بە نەخۆشخانە ئەهلییەكان و بەپێی ئامارەكان لە كۆی 100 ژن لە سلێمانی 46 ژنیان منداڵیان بە نەشتەرگەری لە دایك دەبێت.
بەپێی ئامارەكان لە سنووری پارێزگای سلێمانی ساڵانە نزیكەی 30 هەزار منداڵ لە دایك دەبن و بەپێی رێژەی لە دایكبوونەكەیش نزیكەی نیوەی منداڵبوونەكە بە نەشتەرگەرییە.
پسپۆڕانی تەندروستی ئاماژە بۆ ئەوە دەكەن منداڵبوون بە نەشتەرگەری زیانی گەورە لە كۆرپلە و دایكەكە دەدات و هۆكارە بۆ سەرهەڵدانی چەندان نەخۆشی.
سلێمانی/ هۆشیار عەلی