بەپێی خشتەی دابەشكردنی مووچە، ئەم هەفتەیە مووچەی چەند وەزارەتێك دابەش دەكرێت و سبەی مووچەی بەشێك لە هێزەكانی پێشمەرگە دابەش دەكرێت و 26ـی شوبات كۆتایی بە دابەشكردنی مووچە دێت.
بەپێی ئەو زانیارییانەی دەست "وشە" كەوتووە، سبەی دووشەم 10 شوبات مووچەی هێزەكانی 70 و 80 پێشمەرگە دابەش دەكرێت.
هەر مانگێك عێراق بڕی 452 ملیار دینار بۆ هەرێمی كوردستان دەنێرێت
هەرێمی كوردستان بۆ دابەشكردنی مووچەی فەرمانبەران دوای تەنگژەی دارایی، پشت بە فرۆشتنی نەوت و ئەو بڕە پارەیەی لە بەغداوە بەپێی ڕێككەوتنێك بۆ هەرێمی كوردستان دێتە ناردن دەبەستێت.
بەپێی ڕێككەوتنی نێوان هەرێمی كوردستان و عێراق، لە ناوەڕاستی هەر مانگێك عێراق بڕی 452 ملیار دینار بۆ هەرێمی كوردستان دەنێرێت و بە داهاتی ناوخۆیی و پارەی هاوپەیمانان بۆ پێشمەرگە و فرۆشتنی نەوت مووچەی فەرمانبەران دەدرێت.
لە سەرەتای ئەمساڵ پاشەكەوتی مووچە لەسەر فەرمانبەرانی هەرێمی كوردستان هەڵگیرا و پێدانی مووچە ئاسایی بووەتەوە. لە پێنجی سەرەتای هەر مانگێك لە هەرێمی كوردستان مووچە دابەش دەكرێت.