ژووری ئۆپراسیۆنەكانی پارێزگای هەولێر، كۆمەڵێك بڕیاری نوێی بۆ كردنەوەی شوێنە گشتییەكان دەركرد.
ئەمڕۆ دووشەم 11ـی ئایار، لە ڕاگەیەنراوێكی ژووری ئۆپراسیۆنەكانی هەولێر ڕوون كراوەتەوە، هەموو ئەو شوێنانەی كراونەتەوە و كار دەكەن، دەبێ پابەندی تەواوی ڕێنوێنییە تەندروستییەكان بۆ خۆپارێزی لە كۆرۆنا بن، هەر شوێنێك پابەند نەبێت، ڕێكاری یاسایی بەرانبەر دەگیرێتەبەر.
خۆیان لە شوێنە قەرەباڵغەكان بەدوور بگرن و دەستكێش و دەمامك ببەستن
لە ڕاگەیەندراوەكەدا باس لەوەش كراوە، هێشتا مەترسی ڤایرۆسی كۆرۆنا كۆتایی نەهاتووە و پێویستە هاووڵاتییانی پارێزگای هەولێر زۆر بەهەستیارانە مامەڵە بكەن، خۆیان لە شوێنە قەرەباڵغەكان بەدوور بگرن و دەستكێش و دەمامك ببەستن.
ڕوون كراوەتەوە، یانەی مەیخواردنەوە، نێرگەلەكێشان، شوێنی مەساج، هۆڵی ئاهەنگگێڕان، هۆڵی پرسە، دانانی پرسە و سەردانی نەخۆش لە نەخۆشخانەكان قەدەغەیە و شوێنەكانیش بە داخراوی دەمێننەوە.
ئەو بڕیارانەی ژووری ئۆپراسیۆنەكانی پارێزگای هەولێر لە كاتێكدایە، ئەمڕۆ بڕیار دراوە تەواوی بازاڕ و داودەزگا حكوومییەكان بكرێنەوە.