تا گوێی هەمووان بۆ هەگبەی هەقایەتێكی بەرئاگردان هەڵبخەن و بەسەرهاتێكی فانتازی كۆن لە هەگبەوە دەربێنن، ماوەیەكە ڕاگەیاندنەكانی ڕووسیا برێشكە و تۆوشامیی دابەش دەكەن و حەشامەت لە خۆیان كۆ دەكەنەوە. بە كورتی دەچمە كرۆكی باسەكەمەوە:
بەسەرهاتە ڕووسیەكە سەبارەت بە دوورگەی گۆتڵاند، وا دێتە گێڕانەوە، گوایە پێش زیاتر لە 200 ساڵێك چەند بەرەبابێكی میرخاس و بوێری ڕووسیای قەیسەری شوێنپای باپیرانیان هەڵگرتبێ و ئیتر لەو گۆتڵاندەیدا كیژۆڵەیەكیان بینیوەتەوە و پێیان وتووە قومێك ئاومان بۆ بێنە زارمان هیشك بووە، كیژەكە خەندەی خستووەتە سەر لێوانی خۆی، ئەمانیش دیقەتی ددانەكانیان داوە و بە ددانی كیژانی ڕووسیاییان چواندووە، كاتێك بە دەم تەوس و لاقرتیوە ویستویانە ددانەكانی بپشكنن، كیژە قەپێكی لە پەنجەی فەرماندەكەیان گرتووە و زامداری كردووە، ئەوانیش هێندەی باڵایەك كیژۆڵەكەیان بڵند كردووە و كوتاویانە بە زەویدا، ئەویش بە گریانەوە پێی وتون مەمكوژن من لە نەوەی خۆتانم، دواتر خستویانەتە سەر كۆشیان و كڵاوێكی خۆیان كردووەتە سەری.
پوتین پاش خەوبینینی بەو كیژۆڵە گۆتڵاندیەوە، لە خەویدا ڕاچڵەكیوە و سەرنجی كاتژمێرەكەی داوە و لە بۆنەیەكدا وتویەتی ((وادەكە نزیك بووەتەوە تا داپیرەمان بە كڵاوە ڕووسییەكەیەوە لە چنگی ئەو سویدیانە ڕزگار بكەین..))
سویدیەكان بەم بەند و بالۆرە خورافیە، قەڵس بوون و هاوكات دەترسن لەوەی پۆتین ئانیشكی لێ هەڵماڵێت و بە خشكەیی پای سەربازەكانی ڕابكێشێتە كەناری دوورگەی گۆتڵاندەوە، چونكە جارێكیان لە سەدەی هەژدەیەمدا ڕووسەكان پەلاماری ئەو دورگەیەیان دابوو، دواتر سویدیەكان پایان بڕینەوە و گوێچكەی فەرماندە هەژبەسەرەی پەلاماردەریشیان لە بنا پچڕاند بوو، ڕووسەكان لەو پەلامارەیاندا بۆ سەر گۆتڵاند وێنەی نەنكیشیان پێ نەدۆزرایەوە.
سویدیەكان كە پاسكیلیان پەنچەر دەبێت، هەر خۆیان چاكی دەكەنەوە و وەستای پەنچەرچییان نییە، ئێستەیش وەزیری بەرگریی نیشتمانی پێیان دەڵێت، خۆتان بۆ جەنگ ئامادە بكەن. ئەمە بە واتای ئەوەی ئەگەر هەمووان ئامادە و یەكگرتوو بن، ئەوە خۆیان دەبنە پەنچەرچی تایەی زەمەنیی بەختیان، گۆتڵاند كە پۆتین بۆی سەراسوێیە، هەرگیز قەوزە ناگرێت و سەلامەت دەبێت، پەلاماردەرانیش قەپ لە بەرد دەگرن، چونكە لە ناو سویدیەكاندا كەسێك نییە ئالیك بە سەربازێكی بێگانە بدات تا لە شەودا بزەڕێت. وەك باسی لێوە دەكەن، لەو زەمانەیدا كە ڕووس پەلاماری گۆتڵاندی داوە هیچ هاونیشتمانیەكی سویدی نەبووەتە جاش، هەر سەربازێكی ڕووسیش لەو گۆتڵاندە دوو قاچی تری سەلەم كردووە و بزنانە بۆی دەرباز بوون و گۆتڵاندیان بەجێهێشتووە.
ئیتر ئەم سویدیانە وا خوڵقاون لە ڕووبەڕووبوونەوەی سەختیەكاندا هەر بە تەنیا و تەنیا پشت بەخۆیان ببەستن، لەو كاتانەی هەموو خەڵكی دنیا سنووریان بەسەر خۆیاندا دادەخست و خۆیان لە یەكتری بە دوور دەگرت تا ڤایرۆسی كۆرۆنا بەسەریاندا زاڵ نەبێت، كەچی لە سوید نە كەرەنتین، نە دەمامكیان دەبەست، لە گەشت و گەڕانی خۆیان بەردەوام دەبوون و لە چاو وڵاتانی تری ئەوروپا و جیهاندا، كەمترین زیانیشیان بەركەوت، ئەمان خۆیان بێ لە پەتای كۆرۆناش بە بێ ئەوەی لە تەنیاییش بێزار بن، هەر دوور لە یەكتر ژیان بەسەر دەبەن.
وا هەست دەكەم ڕاگەیاندنی (خۆتان بۆ جەنگ ئامادە بكەن)ی وەزارەتی بەرگریی نیشتمانی، لەو تێگەیشتنەوە سەرچاوەی گرتبێت كە لە باری ناكاو و نەهامەتیی و جەنگ و كارەساتدا، پێویستە مرۆڤە تەنیاكان لە نەستی كۆدا خڕ ببنەوە و پێكەوە ڕووبەڕووی مەترسییەكان ببنەوە، واتە بە منداڵ و ئافرەت و پیاو و پیرانیانەوە، هەرهەمووان بۆ ڕووبەڕووبوونەوەی پەلاماری ڕووسی ئامادە بن، هیچ لاری نییە لەوەی لە بری ئەو 70 هەزار هاووڵاتیانەی لەسەر ڕووبەری گۆتڵاند دەژین، لەبەر دڵنیایی نیشتەجێبووانی گۆتڵاند حەوت ملیۆنێك هاووڵاتی تری سویدی كۆببنەوە.
دڵنیام سوید وەك چۆن ڕێگەیەكی نوێی بۆ ڕووبەڕوونەوەی كۆرۆنا دۆزییەوە، ڕێچكەیەكی سەلامەت بۆ دەربازبوون لەو جەنگە ماڵوێرانكارەش دەدۆزێتەوە .