هەندێ كتێب هەن ناچار بە خوێندنەوەت دەكەن و كە دەست بە خوێندنەوەیان دەكەیت، دەستبەرداربوونیان ئاسان نییە، وەلێ كە دەیانخوێنیتەوە، پڕ دەبیت لە برین و خۆخواردنەوە.
ئەوە بۆیە، ئەوانەی لە مانا و بەهای ئەدەبیات ناگەن و تێی نەگەیشتوون، یان نایانەوێ تێی بگەن و درەنگ تێدەگەن، یاخۆ گاڵتەیان بە خوێنەرانی ئەدەبیات دێ، كۆنستانتین گۆرگیۆ بە (غوڵام) ناویان دەبات و دەڵێ: "كاتی ئەوەیان نییە ڕۆمان و دراما و شیعر بخوێننەوە، ئەوانەی تەنیا كەیفیان بە پرسەنامە و عەرزوحاڵ نووسین دێ "
شەماعییە سەربوردەی دڕندەیی مرۆڤە كە دەشێ لە هەموو چەرخێك دووبارە ببێتەوە
بەهەرحاڵ، ڕۆمانی "شەماعیە"ی (عەبدولسەتار ناسر)ی ڕۆماننووس كە وەرگێڕی بە توانا (سەباح ئیسماعیل) كردوویەتی بە كوردی، لەو چەشنە كتێبە سەرنجڕاكێشانەن كە پەلكێشت دەكەن بۆ خوێندنەوە و دەربەستی برینەكانی تۆش نین.
شەماعییە سەربوردەی دڕندەیی مرۆڤە كە دەشێ لە هەموو چەرخێك و لە سایەی هەلومەرجی جیاوازدا دووبارە ببنەوە.
من ئێستە زیاتر قێز لە مرۆڤبوون دەكەمەوە و لەبەر خۆمەوە دەپرسم:
بڵێی جەلادەكانی ناو ئەو ڕۆمانە و قوربانییەكان لە هەمان ڕەچەڵەك و ڕەسەن بن؟
ئاخر هەنووكە گومان لەوە دەكەم گەڕەكەكەمان، كۆڵانەكەمان، پڕ نەبن لە گرتووخانە.
نەك ڕۆمانەكە خۆی، تەنانەت شەماعییەش لە یادەوەریی مندا بریتییە لە چیڕۆكی نەهامەتیی مێرمنداڵێكی بێكەس، كەسوكارەكانی قێز لە مانەوە و گەورەكردنی دەكەنەوە.
سەربوردەی تۆلازێك لە حەژمەت كۆچی دوایی باپیر و داپیری و بێكەس مانەوەی، ژیانی لەبەر چاودا ڕەش دادەگەڕێ.
گەنجێك ئیتر تێدەگات، بێنەوا و بێناز دەبێت و بۆ تیكەنانێكی مەمرە و مەژی، ناچار بە خزمەتكاریی كەسوكارە دڵڕەقەكانی دەكرێت.
مێرمنداڵێك لە ئەوجی هۆشیاریی و زیتەڵەیی خۆیدا، تەنیا لەبەر نەچوونە ژێرباری جەوری ئەوان پشت و خوێنە دڵڕەقانە، وەك مرۆڤێكی شێت و دەستوەشێن وێنا دەكرێت و بۆ لە یەخەكردنەوە، ڕادەستی زوڵمەتی شەماعییەی بەغدای دەكەن.
دیمەنە جەرگبڕەكانی ئەو ڕۆژانەی خوڕەی فرمێسكەكانیم بیر ناچنەوە، سەدای نركە و نزای بەرائەتی ئەو ڕۆژانەم هێشتا لە گوێچكەدا دەزرنگێتەوە كە لەو كوێستانی منداڵییەدا، بێڕەحمانە توڕی بیابانی وشك و گەرمێنی شەماعییەی دەدەن.
كە شەو (شەماعییە)م خوێندەوە، جگە لە برینی قوربانییەكانی، خوێنی مەیوی چەند ساڵەی برینی قەتماخ نەگرتووی ئەویش ڕژایەوە ناوم. خەیاڵم بۆ ئەوە چوو، چۆن توانیویەتی لەو دۆزەخە قورتاری بێت؟
بیر لەو چركە بریندارانە دەكەمەوە كە لەگەڵ خوێندنەوەی (شەماعییە)دا، وەك یادەوەریی من هیلاك بوون و خوێنیان لێ دەچۆڕا و وەك غەریبزەدەیی باوكم، فرمێسكی تەنیایی و بێنازیان لەگەڵ خۆیاندا بردە گۆڕەوە.
بیر لە وەحشەتی بێكەسیی ساتەوەختەكانی غوربەتی قورس و تاریكیی ناوەوەی باوكم دەكەمەوە، لەناو گەرمایی غوربەتی بیابانیدا كە دەبێ چۆن و بە چ عەزابێكەوە بەڕێی كردبن.
بیر لەو باوەشەی میهر و نەوای ئارامی باوكم دەكەمەوە كە وەك ڕەشماڵی بەزەیی، لە ترسی بێمروەتیی زەمانە و ژیان، دەوریداین و دڵی تەنیایی ناوەوەی خۆی پێ داینەوە.
بیر لە جوانیی ئەو مرۆڤە دەكەمەوە كە ناشیرینی و چەوتی و چەوێڵی مرۆڤ و ژیان فێری كرد، چەتری دڵنەوایی و ئۆقرە و ئارامیمان بێت.
بیر لە هەنسك و فرمێسكەكانی دەكەمەوە كە بۆ گەورەیی (سەید حاجی) /ئامۆزای باوكم بوو/ دەیڕشتن و ئەوكات منداڵ بووم فامم نەكردن و ئێستەیش تەمەنم دەخۆن.