وانەكانی مێژوو

AM:09:07:10/11/2019 ‌

"تاكە وانەیەك لە مێژوو فێری ببین، ئەوەیە كەس لە مێژوو هیچ فێر نەبووە - هیگڵ"


یەكەم/ شۆڕش و گێڕانەوە بە دەم نەخۆشیی ڕەبۆوە

گرنگترین شت لە گێڕانەوەكانی (ئێرنستۆ چێ گیڤارا) لە كتێبی (كۆبەرهەمی گیڤارا، بە پێشەكیی كاسترۆ) ئەوەیە، لە دێڕێكیشدا ناڵێ شانم وابوو، باڵم وابوو. ڕێك بەپێچەوانەوە ئەو لە گێڕانەوەی هەموو وێستگەكانی شۆڕشی كوبادا، لە یەكەم چركەساتەوە كە دەستەیەكی دە دوازدە كەسی، بە یەك دوو شڕە تفەنگ و كۆڵەپشتێكی پێداویستیی پزیشكی، بەسەر پشتی بەلەمێكی شڕ و شەقدا و لەناو پێل و گەرداو و شەپۆلی سەرشێتی دەریادا، خۆیان دەگەیەننە دارستانە چڕدامێنەكانی سییڕا ماسترا، تا سەركەوتنی شۆڕش.

 
بەردەوام دووپات لەسەر خۆڕاگریی، پشوودرێژیی، ماندوونەناسی، لەخۆبوردوویی، بەخشندەیی، ئازایەتیی هاوڕێ و هاوسەنگەرەكانی دەكاتەوە.

سەرەڕای بەتاڵبوونەوەی زۆربەی شۆڕشەكان لە مانا و بەهاكانیان. دوور لە سۆز و كەفوكوڵ، بەڵام بەدڵنیاییەوە هەرگیز درەنگ نییە بۆ خوێندنەوەی و قەتیش سەردەمی خوێندنەوەی (چێ) بەسەر ناچێت، هەرنا بۆ ئەوانەی مێژوویەكیان لەناو شۆڕشی كوردیدا هەیە و دەیانەوێ بیرەوەرییەكانیان بنووسنەوە، چونكە یەك دوو دانە بیرەوەریی لێ دەربچێت، ئەوەی تریان كە كوردە شۆڕشگێرەكان (باشووری كوردستان) نووسیویانەتەوە، پڕن لە نمایشی فس فس پاڵەوانیی، هەڵواسینی هەڵە و تاوان و گوناهی خۆی و سەنگەرە حزبییەكەی بە عەلاگەی بەرانبەری نەیار، سیناریۆی فیلمی هیندی لە گێڕانەوەی شەڕ و داستان و وەسفی هەندێ كەسدا و زۆر چەوتی و چەوێڵیی تریش.

 دووەم/ ئینگلیز و جامانەی قۆڵبڕیی

ئەو كوردە چییە خوایە، یادەوەرییەكەی بۆ وا لە هی (ماسی) كورتترە و هێشتا دیلی وەهمی دۆستایەتیی فڵان كەس و فیسار دەوڵەتە؟
بیرتانە بە سەركەوتنی (بۆریس جۆنسۆن) بۆ پۆستی سەرۆك وەزیرانی بەریتانیا شاگەشكە بوو، گوایە ڕۆژێك لە مەچكۆ جامانەی لەسەر ناوە و جارێكیش لە بەرەكانی جەنگ سەردانی هێزی پێشمەرگەی كردووە، بەڵام كەس هەڵوێستی دوژمنكارانەی ئەو و وڵاتەكەیشی لە بەرانبەر ڕیفراندۆم و خیانەتی 16ی ئۆكتۆبەردا لەبیر نەما.

خودایە كورد بۆ ئەوەندە خۆشخەیاڵە و پێی وایە لە كاروانی تێكۆشانیدا و لەناو هاوكێشەی ململانێكاندا، فڵان كەس دەستی بڕیوە و فیسار دەوڵەت خیانەتی لێ كردووە؟

ئەمەریكای لە گۆڕنانی پەیمانی سیڤەر، پشتكردنە كۆماری كورستان لە مهاباد، پاشقولگرتن لە شۆڕشی ئەیلوولی بیر چووەوە و تازە بە تازە لە سەرێ كانی بیری دێتەوە، ئەمەریكا دۆستی ئەو نییە! 

خودایە ئەو نەتەوەیە كەی بێدار دەبێتەوە و خەونی خۆی لەسەر هیچ هەڵناچنێت، بۆ جارێك تێناگات كە دوای 100 ساڵ، تازە جینۆسایدی ئەرمەنەكان لە واشنتن پەسند بكرێت، دەبێ دوای چەند سەت ساڵی تر، ددان بە جینۆسایدی كورداندا بنێن؟

كورد كە بۆ خۆی دۆستی خۆی نییە، دۆستی بێگانەی لە كوێ بوو؟

خۆزگە كوردی بەخۆ بێگانە ویست و ئیرادەی ئەوەی دەبوو، لەناو خۆیدا دۆستی خۆی بووایە، سندان لە هەزار بەناو دۆستی دەرەكی وا بدات كە نەتەوەیەك دەكەنە قوربانیی بەرژەوەندیی ناو دەوڵەتان.

بەداخەوە، كورد دووجار باجی دۆستایەتی دەدات. جارێكیان خەیاڵپڵاویی بە دۆستی چارەگە ڕێی دەرەكی. پێش ئەمە و لەمەش گرنگتر ئەوەیە، تا ئێستە ویست و ئیرادە و جوامێریی ئەوەی نەبووە دۆستی خۆی بێت.

سێیەم/ ڕاسیزم، دیوە هەرە تاریكەكەی تیرۆر

وڵاتت دەخەنە مەزاتەوە، پارچە پارچەی دەكەن، وەك خێری جەژن بەسەر دوژمنەكانتی دابەش دەكەن. شوناست دەشێوێنن و بۆ هەمیشە برین دەخەنە یادەوەریتەوە.

بە بەرچاویانەوە ئەنفال دەكرێی، ژەهرخوارد دەكرێی، كەچی وەك ئەوە وایە نە (با)یان دیبێ و نە (باران). كاتێكیش هێزی ڕاپسكان دەدەیتە بەرخۆت و بە شوێن شوناسی دزراوی خۆتدا دەگەڕێی و دەتەوێ لە خۆت و نیشتمانەكەت ببیتەوە خاوەن، زلەیەكی دیموكراسی و شەقێكی پێكەوەژیانت تێ دەسرەوێنن.

لە فاشیزمی ئاینی ترسناكتر، سەرهەڵدانەوەی ئەو ڕاسیزمەیە كە نە دەوڵەتت پێ ڕەوا دەبینێ نە مافی قەرەجی، خەیاڵتان دوور نەڕوا، ئەم بۆچوونە بە هیچ شێوەیەك بیانوو نییە، تا دیوە ڕەشەكەی فاشیزمی ئاینی پاساو بداتەوە، ئەو فاشیزمەی هەزار ساڵە و تا ئەمڕۆ مرۆڤایەتی خەڵتانی خوێن دەكات.

چوارەم/ منیش نەبم، مێژوو دەینووسێتەوە

پەشێو دەڵێ:

گشت سەحراكان بنارێكیان پێ ناگیرێ

ئێمە خۆمان لووتكەكانمان پێشكەش كردوون

دوای 2003 و ڕووخاندنی بەعس، كورد وەك حزبی ڕكابەر، نەك كوردی یەكگرتووی خاوەن گوتاری نەتەوەیی گەڕانەوە كەركووك.
ئەوان ڕۆژان گرووپێك لە گەنجی نیشتمانپەروەر، بە ئامانجی پاكتاوكردنی بەعسییەكان و عەرەبی دە هەزاریی تەعریب، گرووپی (تۆڵە)یان دروست كرد، كەچی دەزگە هەواڵگرییەكانی حزبە كوردییەكان، بەهاوئاهەنگی، تۆو و ڕەگی گرووپەكەیان بڕییەوە و نە بە خۆیان تارمایی بەعس و تەعریبیان لەو شارە ڕەواندەوە، نە لێگەڕان كۆمەڵێ گەنجی لەخۆوە كورد، شوێنەواری لیخن و گڵاوی بەعس و تەعریبچییەكان لەو شارە بسڕنەوە.

ئەوە بۆیە لە 2019 عەرەبی تەبعیس و تەعریب و تەهجیر، بێ منەت لەناو كەركووك لە لافیتە و دروشمەكانیان كورد و داعش دەخەنە یەك خانە، یان كێوەلییەكی ڕومادی دێتە كەركووك و بوێریی دەداتە خۆی بە كورددا بڕشێتەوە و ئێستەیش خۆپێشاندانی داواكردن بۆ دابینكردنی خزمەتگوزاریی و بنبڕكردنی گەندەڵییان كردووەتە بیانوو و پاساوی هەمواركردنەوەی دەستوور.



ئه‌م بابه‌ته 166 جار خوێنراوه‌ته‌وه‌‌