جێی شانازییە بۆ خەڵكی كوردستان كە یەكێك لە قوتابیانی دڵسۆز و خزمەتكاری رێبازی كوردایەتیی و بارزانی، لەم قۆناغە سەخت و هەستیارەدا، بەرپرسیارێتیی گەورە و مێژوویی لە سەرشانی خۆی هەڵگرتووە و هێز و تواناكانی لە ڕووی زانستییەوە لە پێناو پارێزگاریی گەل و نیشتمانەكەی و مافە رەواكانی، بەگەڕ خستووە .
ئێمە لەناو هەرێمێكی بچووك لە رۆژهەڵاتێكی ناوەڕاستی ئاگرین و فڕەڕه‌نگی پڕ قەیران و هەڕەشەدا دەژین. لەم هەرێمە و بە تایبەت كاتێك سەیری ئاڵنگارییە رژدەكانی دوای كۆرۆنا دەكەین كە ژیانیان وەستاند، دوای ئەوەش وەك هەمیشە كێشە و ململانێ سیاسییە بەردەوامەكان سەریان هەڵدایەوە، زۆر كەس ئومێدیان نەما و زۆر كەسیش خۆیان دایە دەستی بەرژەوەندییە تەسكە كاتییەكانەوە، بەڵام مرۆڤێك بە هێز و بەوپەڕی تواناوە، دەهێنێتە ناو فەرهەنگی سیاسی و بۆ جێبەجێكردنی ئەركەكانی رووبەڕووی هەموو ئاڵنكاری و بەربەستە ناوخۆیی و دەرەكییەكان دەبێتەوە و "كوردستانێكی بەهێز"، لە ئایدیاوە دەگوازێتەوە بۆ كردەوە و واقیع.
ئێستە كوردستان زۆر دەسكەوتی لە سایەی كابینەی نۆدا بەدەست هێناوە، بە تایبەت لە ڕووی پەرەپێدانی بەرهەمی ناوخۆیی و كارگە و كەرتی كشتوكاڵەوە، بەڵام لەبەر نالەباری ئەو بارە سەپێنراوەی سەر میلەتەكەمان لەلایەن عێراق و هەندێك جار بە فیتی وڵاتانی دەوروبەر، كەمتر هەست بەو بنیاتنانە ژێرخانیی و چارەنووسسازانە دەكرێ، بەڵام خۆ ئەم گەمارۆدان و برسیكردنە بەردەوام نابێت و لە كاتێكی تردا دێینەوە سەر دۆخی ئاسایی و هەمووان لە بەهای ئەو بنیاتنانە گرنگانە تێدەگەین.
حكوومەتەكەی مەسروور بارزانی جیاوازتر و گەشەسەندووترە لە هەموو ئیدارە و دەسەڵاتە هەنووكەییەكان، كەم فەرمانڕەوا هەیە چ لەسەر ئاستی ناوخۆیی یان وڵاتانیش بتوانێ لەناو ئەو هەموو گەمارۆ و ستەمەدا خۆڕاگر بێ، ڕاستە دۆخەكە سەختە و ئەوەیش خواستی كەس نییە، بەڵام خەڵكی هوشیار و نیشتمانپەروەر تێدەگات كە تەنیا هۆكاری ئەم ماندووكردن و لێدانە لە كەرامەتی خەڵكی كوردستان، هۆكارەكە كوردبوونە، ئەگینا ئاسانترین نموونە بۆ تێگەیشتن ئەو دۆخەی عێراقە كە یاسای بودجە جێبەجێ ناكات و مافی خەڵكی كوردستان نادات، دێت دەڵێ قەرزتان دەدەمێ. هەر ئەمە بەسە بۆ پشتیوانی هەمەلایەنەی خەڵك لە حكوومەتەكەی خۆیان بۆ ئەوەی بە بەهێزی بەرانبەر ئەو ستەمەی بەغدا بوەستێتەوە كە تا ئێستە بە ئیرادەی سەرۆك وەزیران هەروا هاتووە و خۆی بەدەستەوە نەداوە.
مەسروور بارزانی نەوەستاوە، بەو هەموو گەمارۆیەشەوە، كاروانی چاكسازی و ئاوەدانیی خستووەتە سەر ڕێ، هەر ڕۆژەی لە شارێكیش دەیبینین كە كارگە دەكاتەوە یاخۆ كاڵایەكی خۆماڵی هەناردە بازاڕه جیهانییەكان دەكات، یا لەگەڵ گرووپێكی خەڵك كۆ دەبێتەوە و بیر لە دنیایەكی باشتر دەكاتەوە، ئەمە ڕێك ئەو هێزەیە كە ناوەرۆكەكەی لە كوردایەتییەوە سەرچاوەی گرتووە و مێژووەكەی خۆی دەناسێت كە بە سەتان ساڵ نەیاران هەوڵی خستنی ئەم گەلەیان داوە و كورد بە پێوە وەستاوە.
لەم رۆژانەدا سەرۆك وەزیران لە وتارێكدا لەكاتی كردنەوەی كارگەیەكی گەورەی ئاسن، گوتەیەكی گرنگی بە گوێی هەموواندا دا، كاتێك گوتی "ئەگەر نیەتی چارەسەری كێشەكان هەبێت لەلایەن بەغداوە، ڕێگەی چارەسەر زۆرە". بەڵام وەك دەبینین بەغدا هەمیشە بەدوای ئەوەیە ڕێكەوتنەكان پشتگوێ بخات و خۆی لە یاسا بدزێتەوە و تەنانەت مووچەیش نەدات كە سەرەتایترین مافە، ئیتر لەوێوە بۆ هەركەس كە بیەوێت تێبگات، هەموو شتێك زۆر ڕوونە كە گەلێك برسی و ماندوو دەكرێت بۆ ئەوەی دەسبەرداری دۆزەكەی بێت، بەڵام با هەمووان بزانن، ئەو گەلە كورد نییە و كوردستان هەرگیز خۆی بەدەستەوە نەداوە بۆ ڕژێمی زۆر بەهێزتر و دڕندەتریش.
سەرۆكی حكوومەت، روانگە و هزرێكە لەسەر بنەمای بەرزڕاگرتنی شكۆ و كەرامەتی تاك و ئیرادەیەكی بەهێز بۆ رووبەڕووبوونەوەی قەیرانەكان، كار بۆ بەدیهێنانی گۆڕانكاریی ریشەیی لە لە ژیانی تاكی كوردستانیدا دەكات و ئومێدی هەموو بەشەكانی كوردستانە وەك حوكمڕانییەكی دەگمەنی كورد، بۆیە ئەم خۆڕاگرییە و بیركردنەوە بنیاتنەرەكانی، هەر دەگات بە ئامانجەكانی كە كوردستانێكی سیستماتیك و دامەزراوەییە لەناو سیستمی نوێی جیهانیدا.