عێراق.. تاوانكاری روو لە هەڵكشانە و دۆخەكە بەرەو پشێوی دەچێت

:: PM:10:39:16/09/2020 ‌

رۆژانە دەیان تاوانی جیاواز و دەگمەن لە رووی قێزەوەنییەوە لە عێراق روو دەدەن، ئەوەیش وای كردووە شارەزا و كۆمەڵناسان وریایی لە رووچوونی دۆخی وڵات بدەن، دوای تاوانە قێزەوەنەكەی شەوی رابردووی سەربڕینی شیلان و ماڵباتەكەی لە بەغدا، پۆلیسی بەغدا ئاشكرای كرد كە كچێكی تر سەری بڕاوە.
خەریكە دۆخی بەغدا لە كۆنترۆڵ دەردەچێت
موقەدەم عەزیز ناسڕ، بەڕێوەبەری راگەیاندن و پێوەندییەكانی پۆلیسی بەغدا گوتی، زانیاری بەدەست بنكەی پۆلیسی حەزەڕ گەیشت بەوەی كچێك كوژراوە، كاتێك تەرمەكەی بە سەربڕاوی لە ناوچەی دۆرە لە بەغدا دۆزراوەتەوە، بۆیە راستەوخۆ دەستمان بە لێكۆڵینەوە و وردبوونەوە لە رووداوەكە لە رێگەی كامێرای چاودێرییەوە كرد. 

زیاتر گوتی، دوای دەستنیشانكردنی گومانلێكراوێك، ئەو گیرا و لەكاتی لێكۆڵینەوە و خستنەڕووی بەڵگەكانی تاوان، ددانی بە ئەنجامدانی رووداوەكە نا، كە هەوڵی دەستدرێژی سێكسی بۆ سەر كچەكە داوە و ئەوكاتەی نەیهێشتووە، هەوڵی خنكاندنی داوە و بە چەقۆ ملی بڕیوە و ئامرازی تاوانەكەی شاردووەتەوە، بۆیە بەپێی یاسا سزا دەدرێت. 

ئێوارەی دوێنێ سێشەم ناوچەی مەنسووری بەغدای پایەتەخت تاوانێكی قێزەوەنی بەخۆیەوە بینی، لە رێگەی كوشتنی شیلان دارا رەئووف، دەرمانساز و دایك و باوكی، بە شێوازێكی زۆر دڕندانە، كە ئەمڕۆ تاوانكار لە هەولێر لەلایەن ئاسایشەوە گیرا و لە تۆمارێكی ڤیدیۆییدا ددانی بە تاوانەكەیدا نا.

لەوكاتەی شارەزایان زیادبوونی تاوانەكان لە عێراق و بەتایبەتی لە بەغدا بۆ جێبەجێ نەكردنی یاسا و خراپیی دۆخی تەناهی و چەكی نایاسایی و بەڕەڵا و خراپیی دۆخی ئابووری و بێكاری و بڵاوبوونەوەی مادەی هۆشبەر و هیتریش دەزانن، سەندیكای پارێزەرانی عێراق رای گەیاند كە پاسەوانەكانی دادوەرێك لە ناوچەی سەدری بەغدا تەقەیان لە ئۆتۆمبێلی پارێزەرێك كردووە، بەڵام نەكوژراوە.



وشە - مه‌حموود ئیسماعیل

ئه‌م بابه‌ته 29 جار خوێنراوه‌ته‌وه‌‌