ب مه‌ره‌ما خزمه‌تكرنا هه‌موو سكته‌رێن ژیانێ و په‌یداكرنا ده‌لیڤێن كاری، 13 پرۆژێن جودا یێن پێشه‌سازی، دێ ل سنوورێ پارێزگه‌ها دهۆكێ هێنه دروستكرن، بڤێ یه‌كێ دێ زورترین ده‌لیڤێن كاری بۆ وه‌لاتیان هێنه‌دان.
پرۆژه پێكدهێن ژ پرۆژێن وه‌به‌رهێنان و گه‌شه‌پێدان و پشتگیریا پێشه‌سازی و دێ ل هه‌موو ده‌ڤه‌رداریێن سه‌ر ب پارێزگه‌ها دهۆكێ بێ جودا هێنه دروستكرن.
كوردۆ ئێحسان، رێڤه‌به‌رێ رێڤه‌به‌رییا گشتی یا وه‌به‌رهێنانێ ل پارێزگه‌ها دهۆكێ بۆ "وشه" دیاركر كو پرۆژه پێكدهێن ژ 13 پرۆژێن جودا دوارێ وه‌به‌رهێنان و گه‌شه‌پێدانن و پشتگیریا پێشه‌سازی ل پارێزگه‌ها دهۆكێ.
زێده‌تر گۆت "رێڤه‌به‌رییا گشتی یا وه‌به‌رهێنانێ ل گه‌ل رێڤه‌به‌ریێن دی یێن په‌یوه‌ندیدار ل گه‌ل پارێزگارێ دهۆكێ كومبوو و د كومبوونێ دا هه‌موو هوكاریێن پرۆژان هاتنه به‌حسكرن، پاشان 13 پرۆژه هاتنه په‌سه‌ندكرن، پرۆژه هنده‌ك وه‌به‌رهێنانن و سه‌ر ب رێڤه‌به‌رییا مه‌نه، هنده‌ك ژی سه‌ر ب رێڤه‌به‌رییا گه‌شه‌پێدانا پێشه‌سازی نه، ئه‌م چاڤه‌رێ دكه‌ین كو پارچه زه‌ڤی بۆ پرۆژان بهێنه دابینكرن و ل نێزیك بهێنه چێكرن داكو بكه‌ڤنه د خزمه‌تا وه‌لاتیان دا، ئه‌ڤ پرۆژه دێ ل هه‌موو ده‌ڤه‌رداریێن سه‌ر ب پارێزگه‌ها دهۆكێ هێنه چێكرن"
ئه‌و پرۆژه‌یێن كو دێ هێنه دروستكرن، دێ ده‌لیڤێن كاری بۆ پتری 570 كه‌سان دابین كه‌ن، ب تایبه‌تی جوتیار و گه‌نجێن نوو دچنه دوارێ كاری دا.