نێزیكێ 20 سالایه گونده‌كێ ده‌ڤه‌را ئامێدیێ ل رێزا ئێكێ بۆ به‌رهه‌مئینانا سلكا ل پارێزگه‌ها دهۆكێ دهێت، ئه‌ڤ ساله ژى نێزیكێ 200 ته‌نێن سلكا هاتینه به‌رهه‌مئینان و بازاڕه‌كێ باش هه‌یه.
جه‌مال دێڕه‌شى، وه‌لاتیه‌كێ گوندێ دێڕه‌شێ یا سه‌ر ب ئامێدیێ یه بۆ "وشه" گۆت، گوندێ دێڕه‌شێ ئێكه ژ گوندێن چاندنێ یا سه‌ر ب ده‌ڤه‌را به‌رێ گارێ ل ئامێدیێ ب تایبه‌تى ب چاندنا سلكا ناڤداره.
زێده‌تر گۆت "هه‌ر چه‌نده چاندنا سلكا ل گوندێ مه هه‌ر ژ كه‌ڤن دا هه‌بویه، به‌لێ پشتى سالا 2002ێ جوتیار و خه‌لكێ گوندى ب شێوه‌ییه‌كێ به‌رده‌وام گرنگى ب چاندنا سلكا دایه و دچینن، هه‌ر چه‌نده چ داتایێن درۆست به‌رده‌ست نینن، ئه‌ڤ ساله نێزیكێ 200 ته‌نێن سلكا ل گوندێ مه هاتینه به‌رهه‌مئینان كو ئه‌ڤ یه‌ك ژى رێژه‌ییه‌كا باشه بۆ گونده‌كێ بچوك یێ وه‌كو دێڕه‌شێ"
محه‌مه‌د ژى وه‌لاتیه‌كێ گوندێ ناڤبرى یه، ئه‌و دبێژیت "هه‌موو خێزانێن گوندێ دێڕه‌شێ یان بێژین پرانیا وان سلكا د چینن و سالانه به‌رهه‌مه‌كێ باش ل بازاڕان دفروشن، ئه‌ڤ ساله نێزیكێ 20 جوتیاران سلك چاندینه و به‌رهه‌مه‌كێ باش ده‌ستخوڤه ئینایه، سلكێن دێڕه‌شێ ناڤ و ده‌نگییه‌كا زۆر هه‌یه و ل پرانیا بازاڕێن پارێزگه‌ها دهۆكێ دهێنه فروتن و بارزاڕێ وان ژى گه‌رمه"
دیاركر ژى كو سلكێن دێڕه‌شێ ل ده‌ستپێكا زڤستانێ دهێنه ده‌رئینان و گۆت ژى "پشكه‌كا زۆر یا خه‌لكێ گوندى ب فروتنا سلكا داهاته‌كێ ده‌ستخوڤه دئینن، به‌لێ جهێ داخێ یه جهێن شوله‌ژێ هه‌تا نوكه چوو گرنگى ب سلكا دێڕه‌شێ نه‌دایه، نوكه ل بازاڕان كیلویا سلكا ب 500 دیناران دهێنه فروتن"
گوندێ دێڕه‌شێ ب دوراتیا 13كم كه‌ڤیته باكوورێ باژێڕێ ئامێدیێ، ژبلى چاندن و خودانكرنا ته‌رشوكه‌والى، هه‌ڤده‌م گونده‌كێ شارستانى یه و دیرۆكه‌كا كه‌ڤنار یا پێكڤه‌ژیانا ئاینى ل ده‌ڤه‌رێ هه‌یه.