زێدهبارى قهیرانا دارایى و پهژیكا كۆرۆنایێ، بهلێ ڤهكرن و چێكرنا بنگههێن گهشتوگۆزارى ل سنوورێ پارێزگهها دهۆكێ بهردهوامه و ئهڤ ساله 10 بنگههێن نوو یێن گهشتیارى هاتینه چێكرن و كهفتینه د خزمهتا گهشتیاران دا.
رێوار محهمهد، پهیڤدارێ رێڤهبهرییا گشتى یا گهشتوگۆزارێ ل پارێزگهها دهۆكێ بۆ "وشه" گۆت، ههر چهنده نوكه حوكمهتا ههرێما كوردستانێ د قهیرانا ئابوورى دایه و پهژیكا كۆرۆنایێ ژى بهردهوامه و كارتێكرنێن خراپ ل سهر رهوشا گهشتوگۆزارێ ل ههرێما كوردستانێ ب گشتى و پارێزگهها دهۆكێ ژى كریه، بهلێ چێكرنا بنگههێن نوو یێن گهشتوگۆزارى بهردهوامه و ئهڤ ساله 10 بنگههێن نوو هاتینه چێكرن و كهفتینه د خزمهتا گهشیتاران دا.
زێدهتر گۆت "ئهڤ بنگههه دكهڤنه ههموو دهڤهرێن پارێزگهها دهۆكێ، بهلێ پرانیا وان دناڤا سهنتهرێ پارێزگههێ هاتینه چێكرن و ههموو ژى ل سهر كهرتێ تایبهتن، بڤێ یهكێ دێ خزمهتهكا باشتر بۆ كهرتێ گهشتوگۆزارى و بهر ب پێشڤهبرنێ هێتهكرن، حوكمهتا ههرێما كوردستانێ ژى ههمو كار ئاسانى ۆ كرینه داكو ئهو ژى بشێن خزمهتا كهرتێ گهشتوگۆزارى بكهن).
پهیڤدارێ رێڤهبهریا گشتى یا گهشتوگۆزارا پارێزگهها دهۆكێ ل بارا ئامارێن گهشتوگۆزارێ ژى "ئهڤ ساله ب تایبهتى د ههردوو ههیڤێن ئێك و دوویێ دا نێزیكێ 40 هزار گهشتیاران سهرهدانا دهڤهرێن گهشتوگۆزارى ل سنوورێ پارێزگهها دهۆكێ كریه، بهلێ زێدهتر بهلاڤبوونا كۆرۆنایێ و داوى رێنمایێن وهزارهتا نافخوه بویه ئهگهر كو رێژه كێم بیت ب تایبهتى گرتنا خالێن دناڤبهرا ههرێما كوردستان و عیراقێ، بهلێ ب گورهى داوى رێنمایى گهشتیارێن عیراقێ دشێن ب ترومبێلێن خوهیێن تایبهت قهستا پارێزگهها دهۆكێ بكهن ب مهرجێ بهرى بهێنه ناڤا پارێزگههێ ب 73 دهمژمێرا پشكنینا كۆرۆنایێ ئهنجام دابیت.
ل پارێزگهها دهۆكێ نێزیكێ 800 بنگههـ و جهێن گهشتوگۆزارى ههنه و ب دهڤهرهكا گهشتیارى دهێته نیاسین، پترى 70% ژ گهشتیارێن وێ ل باشوور و ناڤهراستا عیراقێ دهێن.