سەرچاوەیەك لە شاری مووسڵ رای گەیاند كە هەریەك لە دۆگڵاس سیلیمان باڵوێزی ئەمەریكا لە بەغدا و جەنەڕاڵ ستیڤن تاونسند فەرماندەی هێزەكانی هاوپەیمانانی دژ بە داعش، ئەمڕۆ چوارشەم لە شەقامەكانی مووسڵدا گەڕاون.
بە پێی سەرچاوەكە سیلیمان و تاونسند لە شەقامەكانی بەری چەپی مووسڵ بە هاوەڵی لیوا نەجم جبووری فەرماندەی كردەوەگەلی نەینەوا گەڕاون و ئەوان لە نزیكەوە ئاگەداری دۆخی شارەكە بوون و قسەیان لەگەڵ ئەوانە كردووە كە لە شارەكەدا ماونەتەوە.
تاونسند بەر لە چەند رۆژێك رای گەیاند كە پێشبینی دەكات داعش نزیكەی 200 چەكداری لە مووسڵ مابێت و ئاماژەی كرد كە پاككردنەوەی شارەكەش پێویستی بەچەند هەفتەیەك هەیە.
ئەو جەنەڕاڵە ئاماژەی كرد كە گەڕەكە كۆنەكانی مووسڵ دووچاری وێرانكاری گەورە هاتوونەتەوە و واشنتن درك بەوە دەكات كە هۆكاری ئەو وێرانكارییە هاوپەیمانی نێودەوڵەتی و هێزە هاوبەشەكانی عێراق و چەكدارانی داعشن.
جەنگی ئازادكردنەوەی مووسڵ لە 17ی تشرینی یەكەمی 2016 دەستی پێ كرد و دوای نۆ مانگ جەنگی سەخت، لە 10ی ئەم مانگەدا حەیدەر عەبادی سەرۆك وەزیرانی عێراق ئازادكردنەوەی تەواوی مووسڵی لە داعش راگەیاند، ئەگەرچی هێشتە شارەكە بە تەواوەتی لە پاشماوەی داعش پاك نەكراوەتەوە.