خانه‌قین.. فڕۆكه‌یه‌كی‌ بێ‌ فڕۆكه‌وان كه‌سێكی‌ كوشت

 له‌ ده‌ریاچه‌ی حه‌مرینی سنووری شاره‌دێی سه‌عدیه‌ی سه‌ر به‌ شارۆكه‌ی خانه‌قین، فڕۆكه‌ی بێ فڕۆكه‌وان راوچییه‌كی ماسی كوشت و ئاسمانی ناوچه‌كه‌ی جێهێشتووه‌ .

فڕۆكه‌كه‌ به‌ ئاستی نزم هاتووه‌ و دواتر له‌كاتی جێهێشتنی ئاسمانی ناوچه‌كه‌ به‌ربووه‌ته‌وه‌

ئه‌مڕۆ شه‌موو یه‌كی‌ شوبات، عه‌لی محێدین له‌ ئه‌نجوومه‌نی سنووری ئاواییه‌كانی حه‌مرین "وشه‌"ی‌ ئاگادار كرده‌وه‌، فڕۆكه‌ی بێ فڕۆكه‌وان هاتووه‌ته‌ ئاسمانی ناوچه‌كه‌ و بۆردمانی ده‌ریاچه‌ی حه‌مرینی كردووه‌ و دواتر دیار نه‌ماوه‌.

به‌پێی زانیارییه‌كانی "وشه‌"، فڕۆكه‌كه‌ به‌ ئاستی نزم هاتووه‌ و دواتر له‌كاتی جێهێشتنی ئاسمانی ناوچه‌كه‌ به‌ربووه‌ته‌وه‌ و دیار نه‌ماوه‌.

لای‌ خۆیه‌وه‌ ئه‌حمه‌د زڕگووشی به‌ڕێوه‌به‌ری شاره‌دێی سه‌عدیه‌ بۆ "وشه‌" ئاشكرای كرد، به‌هۆی بۆردمانی فڕۆكه‌وه‌، راوچییه‌كی ماسی له‌ناو به‌له‌م بووه‌ له‌ ده‌ریاچه‌كه‌ و كوژراوه‌.

گه‌رمیان/ سه‌بری هۆرێنی