ئەوەی من دەكات بە كورد، جیناتم نییە، بوونم نییە بە خەڵكی سلێمانی، هاتنم لە دایك و باوكمەوە نییە، حزبایەتیم نییە، ئازارەكانم نین.
كوردبوون هەستێكی زۆر تایبەتە بە رۆحی كوردەوە كە وام لێ دەكات بێ بەرژەوەندی خۆم، لەسەر هەموو پارچەیەكی خاكی ئەم سەرزەوینە، كوردم خۆش بوێت و ئارەزووی كوردبوون بكەم. ئەو كوردبوونەی كە خۆم لێی تێگەیشتووم بە ئەزموونێكی زۆر و كاتێكی پڕ كەوتن و هەڵسانەوە. من باسی چاكە و خراپە ناكەم لە تاكی كورددا. كێ دەتوانێت بە رەهایی بە هیچ مرۆڤێك، نەتەوەیەك یاخۆ میلەتێك بڵێت چاكە یا خراپە و بێ خواروخێچییە؟
لە كاتێكدا، پێشمەرگە "پێش مەرگ كەوتووەكان"، دەست لە ژیانیان بەردەدەن، بۆ رێگەیەكی بێ گەڕانەوە بەڕێ كەوتوون، كورد دەستی داوەتە شێوازێكی زۆر ناشیرین و نەگونجاو لە شارچییەتی و حزبچێتی..خەریكن، هەرچی هەیە و نییە ناشیرینی دەكەن. ئەمە نە بوونی كورد پەسند دەكات و ناوی كورد گەورە ناكات، نەخێر. ئەمە بوونمان هێندەی تر ماندوو دەكات. لەبار دەچین.
كوردبوون تەنیا ئەوە نییە، ناوی ناوچەیەك بلكێنیت بە ناوەكەتەوە. بە زمانی هەولێری و سلێمانی بنووسیت و قەشمەری بە مێژووی میلەتێك بكەیت. فڵان كوردی، سلێمانی، هەولێری، رەواندزی، چۆمانی، شەقڵاوەیی، سۆرانی، كەركووكی، زاخۆیی، دهۆكی، سەنگاوی، سیوەیلی،.. هتد.. نەخێر. كوردبوون ئەوەش نییە، چاوەڕوانی قەرەبووی لێ بكەیت، بۆ ئەو هەستە و هەوڵدانەی داوتە لە رێگەی ئەو كوردبوونەدا.
نەخێر! كوردبوون و ئازارچەشتن لە رێگەی ئەو هەستەدا، نابێت بە ئافەرین و شاباش و گیرفان پڕكردن قەرەبوو بكرێتەوە. چونكە كوردبوون بە تێگەیشتنی من، لە خۆیدا قەرەبووەكەیە. رۆحی كورد جوانە.
كوردبوون ئەوە نییە، بەو زمانە كورد بە یەكتر بە كوشت بدەیت و لە میمبەری مزگەوتەكانەوە بوونی هێزی تاریكی بكەیتە رەوا و بیكەیتە ئاگر و بەریدەیتە گیانی كورد. خۆشەویستیم بۆ كورد ئازارم دەدات، كوردبوونم ماندووی كردووم و هەردەم ناگەمە ئەو چێژە كە تا ئاستی ئەو خۆشەویستییەم بێت كە لە ناوما جموجۆڵ دەكات. ئەمە وایە.. وەك عشق وایە.
كورد نەیتوانی، وەك تاك بۆ راستییەكان بگەڕێت، راستییەكان كۆ بكاتەوە و چاوەڕوانی حزب و سیاسی و رۆشنبیر و رۆژنامەنووس و نووسەر و مەلا و ئەم جۆرە بوونەوەرانەی كرد، وتاری دووبارەكراو و پەیمانی درۆی بدەنێ. ئەمانە كاریگەریی خۆیان وەك دەردێكی موزمین لەناو تاكی كورددا جێ دێڵن. گوێ قوڵاخكردن بە دیار بوونەوەرێكی لەم جۆرانە، بۆ ئەوانە دەبێت كە توانا و ویستی بیركردنەوەیان نییە و چاوەڕوانی یەكێكن، پێیان بڵێت، رێگەكە لە كوێوەیە.
بەلای منەوە، راستییەكان، كاتێك دەردەكەون، هەموو یەكێك لەلای خۆیەوە پەنجەی خستە سەر درۆكانی خۆی. جوانی دەردەكەوێت كە ناشیرینی خۆمانمان بینی و چاوی لێ دانەخەین.
كورد چەندان ساڵ و سەدەیە، هەوڵ دەدات بە جوانی خۆیدا هەڵبدات و بیلاوێنێتەوە و شیعر و شانامەی بۆ بهۆنێتەوە. بەڵام ئەم پیاهەڵدان و لاوانەوەیە نەبووە هۆی كۆكردنەوەمان و كۆبوونەوەمان. چۆنە هەوڵ بدەین، ناشیرینییەكانمان دەستنیشان بكەین و هەوڵ بدەین بەو رێگەیە، كۆ ببینەوە. چونكە جوانی ترسناكە و ناشیرینی تەوازوعە.
روونتر، ئەم شارچییانە و حزبچییانە و هەموو چییەكانی تریش كە كەوتوونەتە وێزی یەكتر لەم كاتەدا، پێشمەرگەی كورد، كە لەوان جوانتر و بەرزترن و خوێنیان وەك رووبار دەڕژێتە ناو خاكی كوردستانەوە، با بچنە ناو ناخی خۆیان و شارەكەی خۆیانەوە و حزبەكەی خۆیانەوە و ببینن، بەدڕووخساری و نەگریسی خۆیان و شارەكەی خۆیان و حزبەكەی خۆیان و باسی بكەن، یاخۆ با بێ دەنگ بن.
پێشمەرگە پێویستی بەم ترسنۆكانە نییە و خوێنیان نەكردووەتە رووبار بۆ ئاودانی زمانی ئەم بەدزمانانەی، تا بێت تاریكتر دەبن و زمانیان لەوە ژەهراویتر دەبێت.
با هەولێرییەكان بڵێن، چییە دەردی ئەو شارە و بەهەمان شێواز سلێمانییەكان، كەركووكییەكان، زاخۆیییەكان و دهۆكییەكان، هەڵەبجەیییەكان، ڕانیەیییەكان و كەلارییەكان و هەموو شارەكان و دێهاتەكانی كوردنشینن.
با بچنە ناو كووچە و كۆڵانەكانی خۆیان و لاپەڕەكانی نووسەرەكانیان بخوێننەوە و هەمووی ببینن. با تەنیا باسی جوامێری و تایبەتمەندی خۆیان و شارەكەیان نەكەن و لە هەمان كاتدا شارەكانی تر بەردباران بكەن. با بكەونە كۆكردنەوەی ناشیرینی خۆیان و شارەكەیان. ئەوسا تێدەگەن لەسەر چ بنەمایەك ئەوان كوردن و چ هێزێكە كۆیان دەكاتەوە بەر لەم جوانی و ناشیرینییانە. با بزانن چ بنەمایەكی تر هەیە!. ئەو بنەمایە ئەگەر هەبێت، تەنیا هێزی روحی كوردبوونە كە كۆمان دەكاتەوە. ئەگەر ئەو بنەمایەمان نەبێت، بۆ رۆڵە جوان و نەمرەكانمان خۆیان بكەنە قوربانی و بۆ كێ؟
ئاراس نووری ئەحمەد تەها