لە یادی ڕۆژنامەگەریی كوردیدا سەرنجێك بۆ ئەو هەڵە و كێشانەی میدیای كوردی كە هۆكارە لە دروستبوونیان دەخەینە روو، دەتوانین بڵێین ڕاگەیاندنی كوردی پاش ساڵی ٢٠٠٩، لە سەردەمێكی زێڕینی خۆیدا بوو بەهۆی ئەو بووژانەوە خێرایە كە لەرووی ئامێر و هۆكارەكانی گواستنەوە كە بەردەستن، بەڵام دەستپێكی نەرێنی بوو لە رووی لایەنی هزری میدیادا، بێ كوالێتی لەرووی ئەدا و پێشكەشكردنی دەزگاكانی بینراو و بیسترا و خوێنراو كە بوونە هۆی شەڕ و گەمەی سیاسیی ناتێگەویشتوو لەسەر بیر و هزری كوردستانی باشووردا.
لەگەڵ ئەوەی هێشتا لە كوردستان نەتوانراوە وەك میلەتێكی خاوەن فەرهەنگ و زمان و مێژوویی، ڕاگەیاندنێكی سەربەخۆیی نەتەوەیی هەبێت، بۆ ئەوەی گرنگی و سەنگی زۆر بەهێز بێت لە كایەی سیاسی و ئابووری و كۆمەڵایەتیدا، هەروەها لە جووڵاندنەوە هەستی نەتەوایەتی و دووركەوتنەوە لە ڕاگەیاندنی لایەنگیری و حزبی سیاسی و ڕاگەیاندنی وڵاتانی داگیركەر كە وەك بووكەڵە لە ژێرەوە كار دەكەن بۆ تێكدانی بەها جوانەكانی كۆمەڵگە لە ژێر ناوی جیاجیا، میدیای ئازاد فەرهەنگ و زمانی خۆیان دەسەپێنن بەسەر كوردستان.
ئەگەر نیوەی ئەو پارە خەیاڵییەی بۆ ئەوان دابین دەكرێت، خەرج بكرێت بۆ ڕاگەیاندنێكی نیشتمانی نەتەوەیی بە هەموو ماناكانیەوە و لەژێر كاریگەری ناسیۆنالستی بێت، بەماوەیەكی كەم هەموو ئامانجە سیاسی و نەتەوییەكانمان باشتر دەپێكین، هاوكارێكی ئەرێنی دەبێت لە لاوازكردنی ڕاگەیاندنی سێبەری داگیركەران، مۆركێكی كوردانەی پێوە دیار بێت و لە ناخی كۆمەڵگەی كوردی بێت لە هەموو لایەنەكانەوە.
ئەوەی ئێستە دەگوزەرێت، بریتییە لە میدیای بازرگانی و بێ بەرهەم و بڕوانامە كڕین وەك خواردنی خێرای لێ هاتووە، ئەوە دەبێتە ئەو كارتە لە دەست داگیركەران تا كار لەسەر كۆمەڵگە بكەن كە لەم نیمچە ئازادییەی لەم هەرێمە دروستمان كردووە.
ئەو تەوژمە نەرێنییەی ئێستە كاری سەرەكی كردووە لەسەر ئەوەی كە ڕاگەیاندنی كوردی بێ بایەخ بێت و هیچ پیرۆزییەكی نەمێنێت لە كار و بەردەوامی پەیامی خۆی، هۆكاری سەرەكی كە ئێستە دەتوانین بڵێین ڕاگەیاندنی كوردی پشت بە سۆشیال میدیا دەبەستێت و لەسەر هەواڵی ناڕاست و دوور لە ئیتیكی ڕاگەیاندندایە لەسەر بنەما‌ی قسە و ناوزڕاندن و گرنگی پێدانی لایەنی ڕاگەیاندنی، دەبێتە هۆكارێك بۆ تێكچوونی شیرازەی كۆمەڵگە و دروستبوونی تەنگژەی ئابووری و سیاسی لە گرێكوێرەیەكی پێچاوپێچ دەخولێتەوە و لە سەرەتایەكی بێ بەڵگە و دیكۆمێنت دەست پێ دەكات، بوونی بیردۆزی پلانگێڕی هۆكارێكی سەرەكیی ئەو ئاڵۆزییەیە كە ئێستە لە ناو ڕاگەیاندنی كوردیدا روو دەدات، بووەتە هۆی ناسەقامگیری گوتار و وتار دروستبوونی تەنگژە، هەروەها نەبوونی بەرپرسی كۆمەڵایەتی (مسۆول الاجتماعیە) هۆكارێكی ترە بۆ ئەوەی ڕاگەیاندن هەموو سنوورەكان ببڕێت و بگات بەو ئامانجە تایبەتانەی كە خۆی دەیەوێت لە سنوورێكی تەسكدا، هەروەها دەستكەوتنی لایەنی دارایی هەموو بنەما سەرەكییەكانی ڕاگەیاندن كە كاری میدیایی دەكەوێتە ژێرباری سوود و قازانجی بازرگانیی ئێستە. بڵاوكراوە و هەواڵی ڕۆژنامەكان كەمترین خوێنەریان هەیە، كاریگەرییە خراپەكان بەدەر دەكەون بە هۆی داخستنی زۆربەی ڕۆژنامەكان، لە گوتاری بەپێزی ئەكادیمییەوە بۆ پۆستی فەیسبووك، لە توێژنەوەی زانستی و نووسەرانەوە بۆ لەبەرگرتنەوەی كۆپیی بابەتی ناو سۆشیال میدیا و ئینتەرنێت بەگشتی.
خاڵی گرنگ لێرەدا ئەوەیە لایەنی پێوەندیدار سنوورێك بۆ میدیای ئازاد دابنێت یان بكەوێتە ژێرباری بەرپرسی كۆمەڵایەتی، بۆ ئەوەی میدیای كوردی بەرەو هەڵدێر نەچێت و زیاتر گرنگی بە میدیا بدرێت بۆ گەیاندنی ئەو پەیامە جوانەی خۆی لە رووی هەستی نەتەوایەتی و نیشتمانی و دووركەوتنەوە لە شەڕی هزری و سیاسی و ئابووری. هاوكاریكردنی ڕۆژنامەكان و گۆڤارەكان لەلایەنی پێوەندیدارەوە، بۆ ئەوەی ڕۆژنامە و گۆڤاری كوردی بەرەو لە ناوچوونی كۆتا نەچێت، چونكە ئێستە بەهۆی تەنگژەی دارایی و لاوازیی رۆشنبیری تاك لە خوێندنەوەدا زۆر لە رۆژنامەكان داخراون.