قۆناغی‌ داهاتووی‌ چاكسازی‌.. مووچه‌ نایاساییه‌كانی‌ وه‌زاره‌تی‌ پێشمه‌رگه‌ ده‌بڕێ‌

:: PM:05:33:19/01/2021 ‌
ئه‌ندامێكی‌ په‌رله‌مانی‌ كوردستان /یه‌كێتی‌/ ڕای‌ ده‌گه‌یه‌نێت، جێبه‌جێكردنی‌ یاسای چاكسازی‌ به‌رده‌وامه‌ و له‌ داهاتوویه‌كی‌ نزیك مووچه‌ی‌ نایاسایی‌ له‌ وه‌زاره‌تی‌ پێشمه‌رگه‌ ده‌بڕردرێ‌.

ئه‌مڕۆ سێشه‌م 19ی كانوونی دووه‌م، عوسمان سێده‌ری ئه‌ندامی په‌رله‌مانی كوردستان /یه‌كێتی/، به‌ "وشه‌"ی راگه‌یاند، جێبه‌جێكردنی‌ یاسای چاكسازی له‌ هه‌رێمی كوردستان به‌رده‌وامه‌ و ئێسته‌ له‌ قۆناغی‌ سه‌ره‌تایه‌ و دواتر هه‌موو وه‌زاره‌ته‌كان ده‌گرێته‌وه‌.

‌ لیژنه‌یه‌ك له‌ وه‌زاره‌تی پێشمه‌رگه‌ وردبینی ده‌كات
روونیشی‌ كرده‌وه‌ كه‌ له‌ سه‌ره‌تاوه‌ كار له‌سه‌ر بڕینی مووچه‌ی نایاسایی ده‌كرێت و له‌ماوه‌ی‌ ڕابردوویش ژماره‌یه‌كی‌ زۆر له‌و مووچانه‌ بڕان.

به‌ گوته‌ی‌ سێده‌ری‌ له‌ قۆناغه‌كانی‌ داهاتوو بڕینی‌ مووچه‌ی‌ نایاسای‌ به‌رده‌وام ده‌بێت و گوتی‌" سه‌ردانی‌ وه‌زیری پێشمه‌رگه‌مان كردووه‌ بۆ پرسی چاكسازی و بڕیِنی مووچه‌خۆری نایاسایی و له‌گه‌ڵ به‌ڕێوه‌به‌ری خانه‌نشینی هه‌رێمیش كۆبووینه‌ته‌وه‌ و ده‌ركه‌وتووه‌ مووچه‌خۆری نایاسایی له‌ناو وه‌زاره‌تی پێشمه‌رگه‌ش هه‌یه‌ و له‌ داهاتوویه‌كی‌ نزیك ده‌ست به‌ بڕینیان ده‌كه‌ین.

سێده‌ری‌ دووپاتی‌ كرده‌وه‌ كه‌ لیژنه‌یه‌ك له‌ وه‌زاره‌تی پێشمه‌رگه‌ وردبینی ده‌كات، لیستی تری بڕینی مووچه‌خۆری نایاسایی و دوو مووچه‌ راده‌گه‌یه‌نرێت.

ئه‌وه‌ له‌كاتێكدایه‌ كه‌ پێشتر حكوومه‌تی‌ هه‌رێمی‌ كوردستان له‌ چوارچێوه‌ی‌ جێبه‌جێكردنی‌ پڕۆژه‌ی‌ چاكسازی‌ سه‌تان مووچه‌ نایاسای‌ بڕی‌.

سلێمانی/ هۆشیار عه‌لی



وشە - سه‌رخێڵ هاشم

ئه‌م بابه‌ته 2915 جار خوێنراوه‌ته‌وه‌‌