پێگەی "میدیا لاین"ی ئەمەریكی ئەمڕۆ لە راپۆرتێك و لەسەر زاری بەرپرسێكی ئەمەریكی، ئەو دۆسیانە ئاشكرا دەكات كە لە سەردانەكەی سەرۆك وەزیرانی عێراق بۆ ئەمەریكا، گفتوگۆیان لەسەر دەكرێت.
پێگەی "
شەفەق نیوز" ئەمڕۆ شەموو 13ی نیسان بڵاوی كردووەتەوە، ئەمڕۆ كە محەمەد شیاع سوودانی و شاندی یاوەری روویان لە ئەمەریكا كرد كە بە بانگهێشتنی سەرۆكی ئەمەریكا سەردانەكە ئەنجام دەدرێت، پێگەی "میدیا لاین"ی ئەمەریكی لە راپۆرتێك و لەسەر زاری بەرپرسێكی ئەمەریكی، ئەو دۆسیانە ئاشكرا دەكات كە جۆ بایدن سەرۆكی ئەمەریكا لەگەڵ سوودانی گفتوگۆیان دەكات.
لەو سەردانەی سوودانی و شاندەكەی یاوەری، سەرۆك وەزیرانی عێراق چاوی بە بایدن سەرۆكی ئەمەریكا و لوید ئۆستن وەزیری بەرگری و ئەنتۆنی بلینكن وەزیری دەرەوەی ئەو وڵاتە دەكەوێت.
بەرپرسێكی باڵای وەزارەتی دەرەوەی ئەمەریكا كە ناوی خۆی ئاشكرا نەكردووە رای گەیاندووە، جیا لە پێوەندییە سەربازی و تەناهییەكان، چەندان دۆسیەی گرنگ هەن لەو سەردانە گفتوگۆیان لەسەر دەكرێت وەك پێوەندیی ئابووری و فێركردن و ژینگە، هاوكات پێوەندییە تەواوی بوارەكانی تر دەكەونە ناو گفتوگۆكانی نێوان ئەمەریكا و عێراق.
بەرپرسە ئەمەریكاییەكە زیاتر گوتی، پێوەندییە سەربازی و تەناهییەكان، بەشێكی دیاریكراوی گفتوگۆكان پێكدێنن، لەوە گرنگتر زیاتر قسە لەسەر پێوەندییەكانی داهاتووی نێوان هەردوو وڵات دەكرێت.
ئەو بەرپرسە ئەوەشی گوت، گفتوگۆكانی نێوان ئەمەریكا و عێراق، لە كاتێكدایە كە زۆر لە وڵاتانی هاوپەیمان لەگەڵ ئەمەریكا، سەرنجیان خستووەتە هاوپەیانیی سەربازی كە ئەمەریكا سەرۆكایەتی دەكات، كاتێك بەهۆی جەنگی نێوان ئیسرائیل غەزەوە، كێشە بۆ بنكە سەربازییەكانی هاوپەیمانان دروست بووە و ململانێكانی هەرێمی زیاتر فراوانتر بوونەتەوە.
راپۆرتەكە ئاماژەی بەوە داوە كە لە مانگی كانوونی دووەمی ئەمساڵ، سوودانی ویستی خۆی بۆ بەكۆتاهاتنی ئەركی هاوپەیمانان لە عێراق راگەیاندبوو. لە كاتێكدا پێوەندیی نێوان ئەمەریكا و عێراق مێژوویەكی ئاڵۆزیان هەیە، بەتایبەتی دوای ئەوەی ئەمەریكا لە 2003دا عێراقی داگیر كرد و رژێمی سەدام حوسێنی رووخاند. ساڵی 2011 هێزەكانی لە عێراق كشاندەوە و لە 2014 دیسان بەشێك لە هێزەكانی گەڕاندەوە.